Aqtóbede qala men aýyl ákimderi saılandy

AQTÓBE. KAZINFORM – Saılaý tórt aýdanda ótti. Barlyǵy 5 aýyldyq okrýg, qala men aýyldan bir-bir ákimnen saılandy.

Áıteke bı, Qarǵaly, Muǵaljar men Yrǵyz 5 aýyldyq okrýg, 1 aýyl men 1 qala ákiminiń saılaýy ótti. Onyń tórteýiniń ókilettilik merzimi aıaqtalǵan, qalǵan úsheýiniń ókilettiligi merziminen buryn toqtatyldy. 

- 7 saılaý okrýgi boıynsha 27 kandıdat usynyldy. Onyń tórteýi «Amanat» partııasynan, bireýi «Respublica» partııasynan, qalǵan 22-i ózin-ózi usynýshy. Kandıdattardyń 70% memlekettik qyzmetshi bolsa, qalǵany bıýdjettik, kommertsııalyq salada eńbek etken. Bireýi jumyssyz. Tirkeýge deıin 3 kandıdat memlekettik qyzmet zańnamasynyń talaptaryna sáıkes kelmedi. Taǵy úsheýi tirkeýge qajetti qujattardy usynbady. Saılaýǵa 21 kandıdat qatysty. Saılanǵan ákimderderdiń tórteýi memlekettik qyzmetshi, ekeýi kommertsııalyq sala ókili, bireýi bıýdjettik sala qyzmetkeri. Ákimderdiń ortasha jasy – 45. Kishisi 30 jasta, eń úlkeni 58 jasta,- dep habarlady Aqtóbe oblystyq aýmaqtyq saılaý komıssııasy.

Aıta keteıik, Áıteke bı aýdany Sulýkól aýyldyq okrýginiń ákimi Taǵanııaz Nııazbaev, Qarǵaly aýdany Velıhov aýyldyq okrýginiń ákimi Suńǵat Nurlymuratov, Yrǵyz aýdany Jaısańbaı aýyldyq okrýginiń ákimi Erlan Muhaıys, Muǵaljar aýdany Taldysaı aýyldyq okrýginiń ákimi Aıbek Muhanov, Qumjarǵan aýyldyq okrýginiń ákimi Beknur Óteýlın, Muǵaljar aýylynyń ákimi Álimjan Qorǵanbaı, Embi qalasynyń ákimi Naýryzbek Sarbasova boldy.

Buǵan deıin habarlaǵanymyzdaı, qańtarda Aqtóbe oblysy Hromtaý jáne Qandyaǵash qalalarynyń ákimderi saılandy. Ekeýi de qylmystyq jaýapqa tartylyp, qyzmetten ketti.