Aqtóbede qala mańyndaǵy aýylda kóshelerdi qardan tazartatyn merdiger anyqtalmaı jatyr
AQTÓBE. KAZINFORM — Alǵa aýdany Marjanbulaq aýylynda kóshe joldaryn tazalaıtyn merdiger áli anyqtalmady. Saldarynan turǵyndar úıine jete almaı qınaldy.

Marjanbulaq aýylynyń turǵyny Abat Omarǵalıevtiń aıtýynsha, taıaýda ǵana aýyl kóshesindegi jaryq sónip, 109 nómiri arqyly kómek suraǵan. Habarlama oblys ortalyǵyna jetip, aýyl ákimi óz renishin bildirgen. Al qazir aýyl shetindegi kóshede qar tazalanbaı jatyr.
— Biz kórshilerimizben birigip, aýyl ishin aralap shyqtyq. Kóp kósheniń qary shyǵarylyp, bizdiń jolymyz tazartylmady. Munda kóshe ataýy joq, tek ýchaskege bólingen. № 1273-ten bastalady. Osynda birneshe úı qatynassyz qalyp otyrmyz. Boran kezinde qar jınalmady, oǵan kóndik. Arada bir aptaǵa jýyq ýaqyt ótti. Balalar sabaqtan qalady, úlkender jumystan da qalady. Sebebi mundaǵy adamdardyń kóbi Aqtóbe qalasyna qatynap jumys isteıdi, — dedi Abat Omarǵalıev.
Al Marjanbulaq aýyldyq okrýginiń ákimi Mırjan Elamannyń aıtýynsha, jyl basynda memlemettik satyp alý rásimi ótkizilip, jeńimpaz anyqtaldy. Alaıda kásipkerler ózara aryz túsirip, shaǵym qaralyp jatyr.

— 2024 jyldyń qarasha aıynda konkýrs jarııalandy. Barlyǵy 7 kásipker qatysty. Onyń úsheýi úsh oryndy ıelendi. Biraq konkýrsqa túsken merdigerler bir-birine shaǵym túsirgen. Qazirgi kezde demeýshilerdiń kómegimen joldy qardan tazartyp jatyrmyz. Aýyl úlken. Bir basynan ekinshi basyna barý úshin 6 shaqyrym bolady. Barlyǵy 73 kóshe bolsa, onyń 65 kóshesi ashyldy. Taǵy 8 kóshe qalyp tur. Aýyldyń tehnıkalarynyń jaǵdaıy belgili, kóne. Qazir jóndeýde tur. Ári biz tek demeýshilikpen jumys atqaryp jatyrmyz, — dedi Mırjan Elaman.
Al aýdan ákimi Aslanbek Shúıinshalıevtiń aıtýynsha, ózge aýyldyń jolyn tazartyp jatqan merdigerlerge ótinish beredi.
Eske salsaq, Aqtóbede aıazdy kúni jol boıynda qutqarý jumysy júrgizildi. Sheteldikter mingen kólikterdiń 100-den astam jolaýshysy men júrgizýshisi jylytý pýnktine jetkizildi.