Aqtóbede qala kúninen soń jappaı tóbelesken jastar uzaq merzimge sottalyp ketti
AQTÓBE. KAZINFORM – Jasóspirimdi kólikpen qaǵyp, birneshe ret pyshaqtaǵan, atys qarýyn qoldanǵan bir top sottalýshy 11-22 jylǵa bas bostandyǵynan aıyryldy. Jábirlenýshi taraptyń moraldyq, materıaldyq shyǵyny óteledi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda adam óltirý, qorqytyp alý isi boıynsha aıyptalǵan 10 sottalýshyǵa úkim oqyldy. Sot úkimimen A.Nysanalıev jáne M.Dılshodbekuly 20 jyl, D. Qusmanov 22 jyl, I.Salovatov, J. Marqabaev, R. Saǵynbaev, T. Eshojın, S.Tıpaev, Á.Saǵynov 15 jyl 6 aı, N. Baqtybaev 11 jyl 6 aıǵa bas bostandyǵynan aıyryldy. Sonymen birge jábirlenýshiniń azamattyq talaby ishinara qanaǵattandyrylyp, sottalýshy A.Nysanalıev, M.Dılshodbekuly, D.Qusmanovtyń árqaısysynan 6 mln teńge, barlyǵy 18 mln teńge moraldyq zııan óndiriledi. Sonymen birge úsheýi 2 959 152 teńge múliktik shyǵyndy tóleýi tıis. Sottalýshylardan barlyǵy zańger kómegine qajet bolǵan 1,5 mln teńgeni tóleıdi.
- Sot qylmysty uıymdastyrýshy Nysanalıev, Dılshodbekuly, Qusmanovtyń kámeletke tolmaǵan jábirlenýshini pyshaqtap, ómirin qıdy degen tujyrymǵa keldi. Osy úsh sottalýshyny adamdar tobymen aldyn ala sóz baılasyp, qasaqana qazaǵa ushyratqan dep tapty. Salovatov úıinen besatar atys qarýyn alyp shyqqan. Marqabaev jáne basqalar eki jáne odan da kóp adamdy qasaqana qazaǵa ushyratýǵa oqtalǵan. Aqyryna deıin jetpegen. Barlyǵy 32 jábirlenýshi bolǵan. Bir baladan basqasy qashyp ketken, qýǵan, jete almaǵan, qylmysty aqyryna deıin jetkize almaǵan. Álisher Nysanalıevtiń tisi syndy, murny syndy, uıaly telefondy alyp ketti degen jeleýmen bastalǵan. 300 myń teńge nemese qymbat telefon alyp berý talaby qoıylǵan. Nysanalıev, Qusmanov jáne olarǵa Dılshodbekuly qosylǵan. Úsheýi sport klýbynan balalardy jınady. Barlyǵy da kelisip, barǵan degen tujyrymǵa keldi, - dedi sýdıa Jánibek Seıtjapparov.
Eske salsaq, byltyr mamyr aıynda jastar jappaı tóbelesip, sol túni aýrýhanaǵa 8 adam tústi.
Іs bıyl naýryzda sotqa túsip, 10 aıyptalýshyǵa Qylmystyq kodekstiń birneshe baby boıynsha aıyp taǵyldy.
Іs materıalyna súıensek, Aqtóbe qalasynyń ortalyq saıabaǵynda kámelet jasqa tolmaǵan bozbala óz qatarlasyn uryp jibergen. Keıin ol bul jaıynda aǵasyna aıtyp, aǵasy áleýmettik jeli arqyly óz inisin urǵan bozbalany izdeıdi. Eki tarap kezdesýge kelisip, kezdesý ornyn № 1 orta mektep aýlasyna belgileıdi. Kezdesý ornyna bir tarap top bolyp jınalyp baryp, ekinshisinde aǵasy eki dosyn ertip barady. Sol kezde inisine jasaǵanyn eske salǵan aıyptalýshy sotta jábirlenýshi bolyp otyrǵan bozbalalardan óteýine 300 myń teńge aqsha men qymbat markaly uıaly telefon talap etken. Biraq olar kelispeı, kezdesý ornyn Mal bazaryndaǵy avtoturaqqa belgileıdi. Sol jerde bir jasóspirim kóz jumdy.