Aqtóbede qala ákimine áıeldi uryp-soqty degen aıyp taǵyldy
AQTÓBE. KAZINFORM — Qardyaǵash qalasynyń ákimine qatysty is Muǵaljar aýdandyq sotynda qaralyp jatyr. Sotta dáriger, sot sarapshysy, memlekettik qyzmetshi, bloger kýálik etti.
Aqtóbe oblysy Muǵaljar aýdandyq sotynda Qandyaǵash qalasynyń ákimine qatysty is qarala bastady. Oǵan Qylmystyq kodekstiń 109-1-baby 1-bóligi boıynsha aıyp taǵyldy. Sot otyrysy kezinde sottalýshy óziniń otbasyly, memlekettik qyzmetshi ekenin aıtyp, aty-jónin jarııalaýǵa qarsylyq bildirdi. Ári taǵylǵan aıyppen kelispedi, jábirlenýshimen tatýlaspady.
— 2024 jyldyń 26 jeltoqsanynda Qandyaǵash qalalyq ákimdiginiń ǵımaratyndaǵy qala ákiminiń kabınetine tanysy barady. Arasyndaǵy túsinispeýshilikten janjal bastalǵan. Aıyptalýshy daýys kóterip, tanysyna ashýlanyp, densaýlyǵyna jeńil zııan keltirgen. Qasyna baryp, moınynan qysyp ustap, sol jaq bas jáne muryn tusynan birneshe ret urǵan. Densaýlyqqa jeńil dárejede zııan keltirip, Qylmystyq kodekstiń 109-1-baby 1 bóligimen kórsetilgen qylmystyq teris qylyq jasaǵan, — dedi prokýror Amanjolov.
Sot otyrysy kezinde jábirlenýshi áıel eki aradaǵy qarym-qatynastyń aq-qarasyn anyqtaý úshin ákimdikke barǵanyn aıtty. Alaıda sottalýshy ózine kúsh qoldanyp, dárigerge qaralǵanyn jetkizdi.
— Moınymdaǵy jaraqatty kórgen soń dáriger qaıdan jaraqat alǵanymdy surady. Men bul kisiniń aty-jónin ataı almadym. Biraq qyzmeti ákimdikte, laýazymdy tulǵa dep aıttym. Aýrýhanaǵa polıtsııa qyzmetkerleri keldi. Olar 24 saǵatta aryz qaralatynyn aıtqan soń qulap qalǵanymdy jazdym. Qazirgi tańda bolǵan oqıǵany qalaı bar, solaı jarııalap, tártiptik jaza suraýdy jón kórip otyrmyn. Oılana kele aryz jazamyn dep sheshtim, — dedi jábirlenýshi.
Aıta keteıik, jábirlenýshide aýrýhanadaǵy anyqtamanyń ýaqyty 27 jeltoqsan dep tur. Onyń sebebin dárigerlerdiń qateligi dep túsindirdi. Al aryzdyń nelikten jarty jyldan soń jazylǵanyn «polıtsııa dálel jetkiliksiz dep qabyldamady, keıin prokýratýraǵa shyǵym jazdym» dep túsindirdi. Jábirlenýshi ózine jergilikti bloger, jumys ornynyń basshysy, ózge balabaqsha meńgerýshisi habarlasyp, aryzdy qaıtaryp alýyn suraǵanyn jetkizdi. Ol muny janama qysym dep túsingen.
Sot otyrysy jalǵasyp jatyr.
Aıta keteıik, dál osy Muǵaljar aýdanynda kezekte turǵandardy baspanamen qamtý isi sotqa tústi. Aıyptalýshylar: depýtattar Baqytjan Qadralın, Azamat Jálimbetov pen Muǵaljar aýdandyq sáýlet, qala qurylysy jáne qurylys bóliminiń basshysy Ánes Seıilhan. Іs Muǵaljar aýdandyq sotyna túskenimen, Aqtóbege aýystyryldy.