Aqtóbede qala ákimi óz-ózine qol jumsady

AQTÓBE. KAZINFORM — Oqıǵa senbi kúni boldy. Temir qalasynyń ákimi Erkin Dalmaǵambetov óz úıinde óz-ózine qol jumsaǵan.

Aqtóbe oblystyq polıtsııa departamentiniń baspasóz qyzmeti qylmystyq is qozǵalǵanyn habarlady.

— Óz-ózine qol jumsaý faktisi boıynsha sotqa deıingi tergep-tekserý jumystaryn bastady. Oqıǵanyń mán-jaıy anyqtalyp jatyr. QR QPK-niń 201-babyna sáıkes ózge aqparat jarııalaýǵa jatpaıdy, — dep habarlady oblystyq PD baspasóz qyzmeti.

Temir aýdanynyń ákimi Almas Jaqsylyqov ta oqıǵany rastady.

— Mundaı oqıǵa bolǵany ras. Qazirgi tańda jan-jaqty qaralyp, tergeý júrip jatyr. Balalary bar, — dedi aýdan ákimi.

Ákimdik aqparatyna súıensek, oqıǵa senbi kúni keshkilik tirkeldi. Ol sol kúni joldastarymen qonaqta boldy.

Aıta keteıik, Temir qalasynyń ákimi Erkin Dalmaǵambetov 2024 jyly saılandy. 

Eske salsaq, bıyl 7 shilde kúni Bestamaq aýyldyq okrýginiń ákimi óz-ózine qol jumsamaq boldy.Sol kezde oblystyq polıtsııa departamenti óz-ózine qol jumsaýǵa oqtalý deregi boıynsha sot aldy tergeýdi bastady.

Aýdan ákimidigi bári de kezekti eńbek demalysyna shyqqan kezde bolǵanyn habarlady. Qol jumsaǵan aýyl ákiminiń isi qysqartyldy. 

Bestamaq aýylynyń ákimi aýrýhanadan shyqqan soń jumysqa qaıta qosyldy.