Aqtóbede qala ákiminiń shyrshasy ótip jatyr
AQTÓBE.QazAparat – Aqtóbedegi jekpe-jek saraıynda 350 balaǵa arnalǵan qala ákiminiń shyrshasy ótti, dep habarlaıdy QazAqparat HAA ákimniń baspasóz qyzmetine silteme jasap.
Qala ákimi Mavr Abdýllın balalardy jańa - 2020 jylmen quttyqtap, olardy oqýda úzdik bolýǵa shaqyrdy.
«Barshańyzdy jańa - 2020 jylmen shyn júrekten quttyqtaımyn. Birinshi kezekte sender jaqsy oqýlaryń kerek, óıtkeni sender bizdiń bolashaǵymyzsyńdar. Aǵa býyn úlken úmit artyp otyr. Táýelsiz memlekettiń negizi – deni saý, bilimdi, eńbekqor jastar», - dedi ol.
Balalar qala ákimnen syılyqtar aldy.
Ákimdiktiń baspasóz qyzmeti qala ákiminiń jańa jyldyq shyrshasy oblys ortalyǵyndaǵy aýdandarda da ótip jatqanyn málimdedi. Birinshi kezekte múmkindigi shekteýli, jetim balalar men muqtaj otbasylardyń balalary, jalpy 1200 adamdy qamtý josparlanǵan.
