Aqtóbede qaǵaz túrinde kórsetiletin qyzmetterdiń kólemi artty
Aqtóbe oblystyq memlekettik qyzmet isteri departamenti elektrondy jáne qaǵaz túrinde kórsetilgen qyzmet túriniń paıyzdyq úlesin eseptep shyǵardy.
2020 jyly Aqtóbe qalasy men aýdandardyń elektrondy túrde qyzmet kórsetý úlesi 66% qurady. Kórsetkish 2019 jylmen salystyrǵanda 17% tómen. Onyń ishinde Áıteke bı, Oıyl, Qobda aýdandarynda belsendilik báseńdegen.
«Qaǵaz túrinde kórsetilgen qyzmetterdiń úlesi jalpy 8% artqan. Onyń ishinde Oıyl, Áıteke bı, Qobda aýdandarynda ósim baıqalady. Elimizdegi pandemııa kezinde ETsQ nemese bir jolǵy paroldi paıdalana otyryp, «Elektrondyq úkimet» veb-portaly, «E-gov mobile» jáne Telegram-bot» mobıldik qosymshalary arqyly memlekettik qyzmetterdi qashyqtan rásimdeýge mol múmkindik jasaldy. Aqtóbe qalasy men aýdandardaǵy áleýmettik-belsendi azamattar sanyn eskersek, ETsQ-ny Aqtóbe qalasy (30%) men Shalqar (14%) jáne Mártók (34%) aýdandarynda az rásimdelgeni anyqtaldy. Bul jergilikti atqarýshy organdardyń halyq arasynda elektrondy qyzmet alýdyń mańyzdylyǵy men qajettiligin túsindirý bóligindegi aqparattyq-tanymdyq jumystarynyń tómendigin kórsetedi»,- dep habarlady Aqtóbe oblystyq memlekettik qyzmet isteri departamentiniń baspasóz qyzmeti.
