Aqtóbede qabyrǵasy sógilip turǵan kópqabatty úıde tekserý aıaqtaldy
AQTÓBE. KAZINFORM – Tehnıkalyq baǵalaýshylar kópqabatty úı qurylymynyń buzylmaǵanyn aıtyp, qorytyndy shyǵarǵan. Endi merdiger mekeme qalpyna keltirý jumysyn kepildik aıasynda júrgizedi.
Aqtóbe qalasy Eset batyr turǵyn alabyndaǵy múgedektigi bar, kópbalaly otbasylar men memlekettik, bıýdjettik mekemede jumys isteıtin azamattarǵa berilgen úıdiń turǵyndary kútken qorytyndy shyqty. Qala ákimi baspasóz qyzmetiniń habarlaýynsha, 9 qabatty kóppáterli úıge «Tehnadzor Grýpp» JShS tekserý júrgizdi.
- Tekserý nátıjesi boıynsha ǵımarattyń jalpy qurylymynyń buzylmaǵany anyqtaldy. Úıdiń negizgi kótergish bólikteri, ıaǵnı, ishki jáne syrtqy qabyrǵasyndaǵy panelderi men qabataralyq taqtatasynda tolyq tesip ótetin jaryqtar, qaýipti ózgeris nemese qurylymǵa qaýip tóndiretin aqaý anyqtalmaǵan. Ǵımarat jáne onyń negizgi kótergish bólikteri qısaımaǵan. Sondaı-aq kótergish qabyrǵa panelderi ornynan yǵyspaǵan. Mamandar ǵımarat qaýipsiz degen qorytyndyǵa keldi. Tehnıkalyq qorytyndy qurylys konstrýktsııalaryna júrgizilgen tekserý nátıjeleri boıynsha ázirlendi, - dedi Aqtóbe qalasy ákiminiń baspasóz hatshysy Aıgúl Baımenova.
Páterler arasyndaǵy jaryqty, syzatty úıdi salǵan «Aqtóbe sáýlet» JShS jóndeıdi. Jumystyń bári kepildik aıasynda atqarylady. Aıgúl Baımenovanyń aıtýynsha, merdiger kompanııa ókilderi páter ıelerimen kezdesip, jóndeý jumystaryn júrgizý máseleleri boıynsha túsindirý jumystaryn júrgizdi.
Eske salsaq, Eset batyr turǵyn alabyndaǵy 9 qabatty úı turǵyndary kúni-túni qorqyp otyrǵanyn aıtty. Olar bul baspanany ondaǵan jyl kútip, qazir aı saıyn nesıe tólep otyr.
