Aqtóbede qabyrǵasy qaq aıyrylyp turǵan eki qabatty úıdiń turǵyndary kómek surady
AQTÓBE. KAZINFORM — Mártók aýdany ortalyǵyndaǵy úıde 4 páter bar. Temirjol mańynda ornalasqan úıdiń turǵyndary «úıindi astynda qalamyz» dep qorqyp otyr.
Aqtóbe oblysynyń turǵyny Roza Qorazova anasy turyp jatqan úıdi kórsetip, kómek surady. Onyń aıtýynsha, anasy ІІ top múgedegi. Eki qabatty úıdegi tórt páterdiń birinde turady.
— Bizdiń úıimiz apatty jaǵdaıda. Úı qaq aıyrylaıyn dep tur. Іrgetasy sógilip, qabyrǵasynda jaryq paıda boldy. Jaryq irgetasynan bastap, shatyryna deıin jetken. Aılar ótken saıyn jaǵdaıy nasharlap barady. Qysta kireberis esik jabylyp turdy, qazir ashyq qaldy. Bul úı irgetasynyń otyryp jatqanyn dáleldeıdi. Byltyr dabyl qaǵyp, Mártók aýdandyq turǵyn úı — kommýnaldyq sharýashylyq bólimine habar berdik. Olar turǵyndardyń ózderi apatty dep taný jolyn qarastyrýy kerek dep otyr. Oǵan bir emes, barlyq turǵyn aryz jazýy tıis. Al tórt páterdiń úsheýi aýdandyq TÚKSh bólimine qaraıdy, — dedi turǵyn Roza Qorazova.
Keıin Mártók aýdanynyń ákimi Medet Ysqaqovpen kezdesip, máseleni ashyq aıtady. Aýdanda komıssııa qurylyp, úıge tekserý jumysy júrdi.
— Aýdan ákimi taıaýda qaıta kelip, qarady. Úıdiń irgetasyn ózimiz jóndeýimiz kerek eken. Sodan keıin úıdi bekitý úshin jan-jaǵynan tarttyryp tastaıdy. Biraq úıdiń irgetasy ortaq múlik, ony bir páterdiń ıesi óz erkimen jóndeı almaıdy. Shaǵym jazyp, oblys ákimdigine joldadym. Olar shaǵymdy Mártók aýdany ákimdigine qaıta baǵyttaǵan. Nege eshkim ózine jaýapkershilik alǵysy kelmeıdi? Men múmkin emes nárse suramaımyn. Anam ІІ top múgedegi jáne ol osy úıde qırandy astynda qalamyn dep qoryqpaı turǵysy keledi, — dedi Roza Qorazova.
Mártók aýdany ákimdiginiń habarlaýynsha, 2025 jyly turǵyn aryz jazyp, úıde tehnıkalyq baǵalaý júrgizildi. Táýelsiz baǵalaýshylar eki qabatty úıdi apatty dep tanymady, ıaǵnı jóndeýge jaramdy.
— Kúrdeli jóndeý jumystaryna dep jobalyq-smetalyq qujat daıyndalady. Keıin ol saraptamaǵa jiberiledi. Qujat daıyndaý úshin qarjy surap otyrmyz. Taıaýda aýdandyq máslıhat otyrysy ótedi. Jóndeý jumystarynyń merzimi týraly naqty aıta almaımyz, — dedi Mártók aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Aıdos Qalımaǵambetov.
Eske salsaq, buǵan deıin osy aýdandaǵy Jaısań aýyly týraly jazyldy. Munda da eki qabatty úı jóndeýdi qajet etip tur. Alaıda onyń naqty ıesi ázirge belgisiz.
