Aqtóbede ıtti aıaýsyz pyshaqtaǵan bala buǵan deıin de mektepishilik esepte turǵan

AQTÓBE. KAZINFORM — Temir aýdany, Keńqııaq aýdany oqýshysynyń isi komıssııada qaralady. Psıhologtar da balamen jumys isteıdi.

Itti pyshaqtap, aıaýsyz tepken bala isi qazir tergeýde. Al oblystyq bilim basqarmasy balany tárbıeleý úshin birneshe amalyn qarastyryp jatyr. 

— Ol osyǵan deıin tártibi, minez-qulqyna baılanysty mektepishilik esepte turǵan bala. Tergeý amaldary aıaqtalǵan soń, Kámeletke tolmaǵandar isi jónindegi komıssııa otyrysyna shyǵarylady. Psıhologtar saýyqtyrý jumysynyń josparyn daıyndap qoıdy. Jospar aıasynda balaǵa psıhologııalyq qoldaý kórsetý, agressıvti minez-qulqyn túzetý jáne áleýmettik beıimdelýine kómektesý sharalary qarastyrylǵan. Sonymen qatar, ata-anasymen birlesken keńester ótkizip, otbasy jaǵdaıyn jaqsartýǵa baǵyttalǵan is-sharalar uıymdastyrý josparlanýda. Mektep ákimshiligi de oqýshynyń bilim alýyna jáne tártibin qadaǵalaýǵa erekshe nazar aýdaratyn bolady. Ekinshi bala da nazarda bolady. Nemquraıly bolmas úshin tárbıelik, psıhologııalyq jumystar júrgiziledi, — dedi Aqtóbe oblystyq bilim basqarmasynyń basshysy Jaıyq Sultan.

Eske salsaq, Temir aýdany Keńqııaq aýylynda oqýshy ıtti jippen baılap ustap, oǵan pyshaq suqty. Vıdeo áleýmettik jeli arqyly tarap ketti.