Aqtóbede Italııadan kelgen ájesi men nemeresi karantınde jatyr
Aqtóbe oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva búgin baspasóz máslıhatynda sanıtarlyq-epıdemıologııalyq jaǵdaıdyń turaqty ekenin aıtty. Oblysqa 6 adam kelip, dárigerler bárin baqylaýǵa alǵan.
«Qytaıdan kelgen tórt adam karantınde bolyp, vırýs anyqtalmaǵan soń shyǵaryldy. Al Italııadan kelgen eki adam qazir dárigerler baqylaýynda. Ájesi men nemeresi shetelge demalýǵa barǵan eken», - dedi Nursulý Berkimbaeva.
Aıta keteıik, Aqtóbede arnaıy shtab qurylǵan. Jaǵdaı kúndelikti baqylaýǵa alyndy.
«Infektsııalyq aýrýhanada arnaıy 25 kereýettik ızolıator jáne júıke aýrýyna shaldyqqan azamattardy emdeý ornynda qosymsha 105 kereýet daıyn tur. Bul jerde tolyq jaǵdaı jasalǵan. Materıaldyq-tehnıkalyq bazasy jaqsy, dári-dármek jetkilikti. Dárigerler arnaıy daıyndyqtan ótti. Oǵan qosymsha medıtsınalyq kolledjdiń jataqhanasy men «Munaıshy» lagerin qosyp, 500 oryn daıyndaldy. Osy jaǵdaıǵa baılanysty jedel járdemniń eki brıgadasy daıyndaldy «, - dedi oblystyq densaýlyq saqtaý basqarmasynyń basshysy Áset Qalıev.