Aqtóbede Italııa men Ispanııadan kelgender karantınde jatyr
AQTÓBE. QazAqparat – Aqtóbe oblysy boıynsha 5 adam karantınde jatyr, dep habarlaıdy QazAqparat tilshisi.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti aımaqta koronovırýs ınfektsııasy tirkelmegenin habarlady. Aqtóbede sanıtarlyq-epıdemıologııalyq jaǵdaı turaqty.
«Búgingi kúni 1 «A» sanaty boıynsha 5 adam statsıonarlyq karantınde jatyr. Onyń ishinde 2 adam Italııadan kelgen (bireýi bala), saraptama nátıjeleri teris. Taǵy 2 adam Ispanııadan kelgen, saraptama nátıjeleri teris. Bir adam Germanııadan kelgen, onyń da saraptama nátıjesi teris. 1 «B» sanaty boıynsha 20 adam úı karantınine alyndy. 2 sanattaǵy elderden kelgen 28 adam telefon baılanysy arqyly medıtsınalyq baqylaýda», - dep habarlady oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
Barlyq epıdemııaǵa qarsy qajetti is-sharalar, onyń ishinde oqshaýlaý, emdeý jáne dezınfektsııalyq jumys ýaqytyly júrip jatyr.
«Kúnine shekaradan 700 adam ótedi. Onyń ishinde koronovırýs ınfektsııasy boıynsha qolaısyz elderden kelgen azamattar baqylaýǵa alynady. Ótken táýlik ishinde shekaradan 648 adam ótken. Resmı aqparatty Densaýlyq saqtaý mınıstrliginiń, Komıtettiń jáne departamenttiń áleýmettik jelidegi paraqshasynan oqýǵa bolady. Sonymen qatar 1406 nómiri táýlik boıy jumys istep tur. Sondaı-aq koronavırýs ınfektsııasyna qatysty suraqtar boıynsha Aqtóbe oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń 8/7132/ 55-77-37 baılanys nomerine, dáriler jáne maskalar boıynsha – 8/7132/ 55-75-18 baılanys nomerine habarlasa alasyzdar», - dep habarlady oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
