Aqtóbede ІT-park quryldy

AQTÓBE. QazAqparat - Aqtóbede ІT-park quryldy. Bul týraly Aqtóbe oblysynyń ákimi Eraly Toǵjanov shyǵarmashyl jastarymen kezdesýinde aıtty, dep habarlaıdy QazAqparat tilshisi.

Óńir basshysy jastarmen kezdesip, kreatıvti salalardy damytýdyń keleshegin talqylady. Erkin formatta ótken jıynda jastar óz oıymen bólisip, tolǵandyrǵan máselelerin ortaǵa saldy. Eraly Toǵjanov kreatıvti salalar ekonomıkanyń draıverine aınala alatynyn jáne bul salany damytýda daryndy jastar mańyzdy ról atqaratynyn atap ótti.

«Men ıdeıalardy tyńdaǵym keledi. Shyǵarmashylyq salalardy damytýǵa, daryndy jastardyń mádenı áleýetin tolyq iske asyrýǵa qolaıly jaǵdaı jasaý úshin ne qajet dep oılaısyz?», - dedi oblys ákimi jınalǵandar aldynda.

Shyǵarmashyl jastarǵa arnalǵan kovorkıng ortalyqtaryn ashý, tsıfrlyq bilim berý kontentin qurý boıynsha jas muǵalimder arasynda baıqaý uıymdastyrý, kıbersport federatsııasynyń fılıalyn ashý, ІT-park qurý týraly jáne aımaqtaǵy tsıfrlyq ındýstrııany damytý ortalyǵyn ashý týraly usynystar aıtyldy.

Usynystardy tyńdaǵan Eraly Toǵjanov apta sońyna deıin olardy júzege asyrýdyń naqty josparymen tanystyrý mindetin qoıdy. Sonymen qatar Aqtóbede aqparattyq tehnologııalar parkin qurý jumystary bastalyp ketkenin aıtty.

«Men qysqa merzimde ІT-park qurýdy tapsyrdym. Ideıa qajet. Árıne, materıaldyq bazamen qamtamasyz etý jaǵynan qoldaý kórsetiledi. Koronavırýstyq pandemııa IT salasyn damytýdyń qanshalyqty mańyzdy ekenin kórsetti. Birneshe jyldan beri aqparattyq tehnologııalar álemdik ekonomıkadaǵy eń qarqyndy damyp kele jatqan sala ekenin bylaı qoıǵanda, qazirgi ýaqytta onsyz jedel sharalar qabyldaý múmkin emes», - dep atap ótti aımaq basshysy.

Oblys ákimi men aqtóbelik jastardyń usynystaryn jan-jaqty qarastyrý jónindegi kezekti kezdesýi osy aptanyń sońynda ótedi.