Aqtóbede ishki suranysty tolyq óteıtin kirpish zaýyty salynyp jatyr
AQTÓBE. QazAqparat - Aqtóbede jylyna 120 mıllıon kirpish shyǵaratyn zaýyt salynyp jatyr. Bul ishki suranysty tolyq qamtamasyz etýge jetedi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev birneshe áleýmettik mańyzy bar nysandy aralap, kirpish zaýytynyń qurylys jumysymen tanysty. «Kóktas Aqtóbe» AQ-nyń bas dırektory Rýslan Jaqypovtyń aıtýynsha, óndiris orny maýsym aıynda iske qosylyp, alǵashqy synama ónim alynady. Jobalyq qýaty - jylyna 120 mln kirpish. Zaýytta jumys avtomattandyrylǵan jáne tsıfrlandyrylǵan. Barlyǵy 60 jumysshy kirpishti tıeý, tasymaldaý jumystarymen ǵana aınalysady.
Óńir basshysy Berdibek Saparbaev qaldyqsyz ári ekologııalyq taza ónim shyǵaratyn zaýyttyń jumysymen tanysyp, ishki naryqty tolyq qamtamasyz etýge múmkindik beretin zaýytty der kezinde iske qosýdy tapsyrdy. Investor zaýytty salýǵa 7 mıllıard teńge jumsady. Іshki naryqpen qatar, kórshi oblystarǵa satý josparda bar.
Aqtóbe oblysy ákiminiń baspasóz qyzmetiniń habarlaýynsha, óńir basshysy perınataldy ortalyq qurylysymen tanysty. Jańa medıtsınalyq emdeý mekemesi keler jyly paıdalanýǵa beriledi. Perzenthanada akýsherlik jáne neonatologııa salalaryndaǵy barlyq emdeý sharalary júrgiziledi. Munda týabitti aýrýǵa shaldyqqan balalarǵa shuǵyl em jasalyp, ana men sábıge kútim kórsetiledi. Joba quny - 15,7 mıllıard teńge.
Sonymen qatar, Berdibek Saparbaev Aqtóbe qalasy Jańaqonys aýylyndaǵy 300 oryndy mekteptiń qurylysyn qarap shyqty. Joba quny - 915 mıllıon teńge. Mektep jańa oqý jyly paıdalanýǵa beriledi. 
