Aqtóbede iri kásiporyndar jumys ornyn saqtaý memorandýmyna qol qoıdy
AQTÓBE. QazAqparat - Aqtóbe oblysynyń ákimdigi, kásiporyndar men kásipodaq jumys ornyn saqtap qalý memorandýmyna qol qoıdy, dep habarlaıdy QazAqparat tilshisi.
Aqtóbedegi munaı-gaz, taý ken salalarynda úshjaqty memorandýmǵa qol qoıyldy. Ortaq kelisim boıynsha jumys orny sol kúıi saqtalady.
«Memorandýmǵa Aqtóbe oblysynyń kásipodaq ortalyǵy men oblys ákimdigi jáne óńirdegi iri kásiporyn basshylary qol qoıdy. Olar: «Voshod Oriel», «Voshod Hrom» jáne «Aqtóbe mys kompanııasy» men «Kopper Teknolodjı» JShS-i. Bul kásiporyndarda jumysshylar qysqartylmaıdy, jalaqyny ýaqtyly tóleý jáne eńbekaqyny ósirý erekshe nazarda bolady», - dedi aýmaqtyq kásipodaqtar birlestiginiń tóraǵasy Altynbek Ámirǵalıev.
Aıta keteıik, óńirde jumysshylardyń jalaqysyn ósirý máselesi jıi kóterilip jatyr. Sebebi Qazaqstannyń batys aımaǵy boıynsha aqtóbelikter eń az jalaqy alady.
«Jalaqyny 6 paıyzdan 50 paıyzǵa deıin kóterý usynysy barlyq kásiporyn basshylaryna tapsyryldy. Kompanııa ekonomıkalyq jaǵdaıyna qaraı berilgen tapsyrmany júzege asyrady. Sońǵy málimet boıynsha munaı kompanııasy 25 paıyzǵa eńbekaqyny ósirdi. Qazir «Voshod Oriel», «Aqtóbe mys kompanııasy» seriktestikteri arasynda ınvestıtsııa tartý, jumys ornyn, eńbek qatynastary zańdylyǵyn saqtaý kelisimi jasaldy», - dedi oblys ákiminiń orynbasary Qaırat Bekenov.
