Aqtóbede iri qaradan aýrý shyǵyp, tekserý bastaldy

AQTÓBE. QazAqparat – Aqtóbe oblysy Áıteke bı aýdany Tereńsaı aýylynda 5-6 bas iri qaradan aýrý shyǵyp, Astanadan kelgen mamandar silekeı, qan synamasyn aldy, dep habarlaıdy QazAqparat tilshisi.

Іri qaranyń aýzynan silekeı aǵyp, jem-shópten bas tartqan. Sharýalar dabyl qaqqan soń veterınarlar iri qaradan birneshe synama aldy.

«Veterınarııa boıynsha ulttyq referenttik ortalyq» sharýashylyq júrgizý quqyǵyndaǵy kásiporynǵa Astana qalasynyń mamandary kelip, aýyryp turǵan iri qaradan patologııalyq synamalar (silekeı, qan) alyp, zertteýge jiberdi. Jalpy byltyr aýsylǵa qarsy 1 665 271 doza vaktsına alynyp, taratyldy. Bul óńirdegi barlyq malǵa jetýi tıis. Endigi suraq, shynymen de bar malǵa vaktsına salyndy ma? Aýyrǵan malǵa ýaqytyly vaktsına berildi me? Qazir qyzmettik tekserý júrip jatyr», - dedi oblystyq veterınarııa basqarmasynyń basshysy Qusaıyn Sársembaı.

Onyń aıtýynsha, veterınar mamandar aýyldyq okrýgtegi aýlalardy aralap, tekserý júrgizip jatyr. Biraq aýsyl aýrýyna klınıkalyq belgiler anyqtalmaǵan.

«Jalpy Áıteke bı aýdanynda epızootııalyq jaǵdaı turaqty. Múıizdi iri qarada ólim-jitim tirkelmegen. Buzaý ólgen derek bar. Biraq ol bul jaǵdaıdan buryn bolǵan ári mal ıesi eshkimge habar bergen. Veterınarııa boıynsha ulttyq referenttik ortalyǵy synama nátıjıesin shyǵarǵan soń qosymsha málimet beriledi», - dedi Qusaıyn Sársembaı.