Aqtóbede Yrǵyz aýdanynyń ákimi taǵaıyndaldy
AQTÓBE. KAZINFORM – Aýdan ákimi qyzmetine Rústem Óteshov kiristi. Ol buǵan deıin Aqtóbe qalasy Almaty aýdanynda ákimi boldy.
Búgin QR Prezıdenti ákimshiliginiń jáne Yrǵyz aýdandyq máslıhat depýtattarynyń kelisimimen Yrǵyz aýdanynyń ákimi laýazymy qyzmetine Rústem Óteshov kiristi. Ol Q.Jubanov atyndaǵy Aqtóbe memlekettik ýnıversıtetin áleýmettik ortada jáne salalardaǵy ekonomıst menedjeri, Qazaq gýmanıtarlyq zań ýnıversıtetin quqyqtaný mamandyqtary boıynsha támamdaǵan. Eńbek jolyn Aqtóbe oblysynyń kommýnaldyq menshik basqarmasynda jetekshi mamany bolyp bastady. Keıin Aqtóbe oblysynyń birneshe basqarmasynda qyzmet atqardy. 2024 jyldan kúni búginge deıin Aqtóbe qalasy Almaty aýdanynyń ákimi boldy.
Aýdan ákimin aktıvke oblys basshysy Ashat Shaharov tanystyrdy. Birqatar ózekti suraqtardyń sheshimin tabýdy tapsyrdy.
- Aýdanda et klasterin qalyptastyrýǵa da múmkindik mol. Yrǵyzda oblystaǵy iri qara maldyń 7 paıyzy, ıaǵnı 31,4 myń basy shoǵyrlanǵan. Alaıda aýdan aýmaǵynda et óńdeıtin birde-bir kásiporyn joq. Osyǵan baılanysty óńdeý óndirisine ınvestıtsııa tartý jáne daıyn ónimdi basqa óńirlerge shyǵarýǵa múmkindik beretin óndiristik tizbek qalyptastyrý mindeti júkteldi. Azyq-túlik qaýipsizdigi máselesine de basymdyq berildi. Aýdanǵa jylyjaılar men kókónis saqtaıtyn qoımalar da qajet. Oblys ortalyǵynan 454 shaqyrym qashyqtyqta ornalasqan aýdan úshin bul másele aıryqsha mańyzdy. Sondyqtan jergilikti óndiristi damytý jáne turǵyndardy negizgi azyq-túlik ónimderimen qamtamasyz etý deńgeıin arttyrý kerek. Jeke turǵyn úı qurylysyna jer telimin alý kezeginde turǵan 815 azamattyń máselesin sheshý de jańa ákimniń basty mindetteriniń biri retinde belgilendi. Ol úshin ınjenerlik ınfraqurylymdy júrgizý jumystary jandanýy tıis,- dep habarlady Aqtóbe oblysy ákiminiń baspasóz qyzmeti.
Sonymen birge sý resýrstary salasynda da birqatar qıyndyq bar. Aýdan aýmaǵyndaǵy 14 gıdrotehnıkalyq qurylystyń 8-i qanaǵattanarlyqsyz jaǵdaıda. Nysandardy kezeń-kezeńimen jóndeý jáne qalpyna keltirý boıynsha naqty jospar ázirleý tapsyryldy. Ekologııalyq týrızmdi damytý, onyń ishinde Yrǵyz-Torǵaı memlekettik tabıǵı rezervatynyń múmkindikterin tıimdi paıdalaný kerek. Budan bólek, avtomobıl joldarynyń jaǵdaıyn jaqsartý, jol qurylysy jobalaryn belgilengen merzimde aıaqtaý, eldi mekenderdi veterınarııalyq pýnkttermen qamtý, aýdandyq aýrýhananyń materıaldyq-tehnıkalyq bazasyn nyǵaıtý, qatty turmystyq qaldyqtar polıgonynyń jobalaý-smetalyq qujattamasyn ázirleý baǵyttarynda tapsyrmalar berildi.
Eske salsaq, Aqtóbede on kún buryn Oıyl jáne Shalqar aýdandarynyń ákimi aýysty.
