Aqtóbede irgetasy sógile bastaǵan jańa úıdiń turǵyndary kóshiriledi
Eset batyr turǵyn alabyndaǵy úı 2019 jyly qoldanysqa berilgen. Qurylysty «Mashat» JShS júrgizgen.
Turǵyndardyń biri taıaýda jertólege túsip, ondaǵy jaǵdaıdy bildi. Іrgetasynda jaryq kóp, úgitile bastaǵan. Keıin jan-jaqqa habar berdi.
Aqtóbe qalasy ákiminiń baspasóz qyzmetiniń habarlaýynsha, búgin qala ákiminiń orynbasary Jangeldi Áýbákirov Eset batyr turǵyn alaby 39 K, 40 K mekenjaılarynda kópqabatty eki turǵyn úıdiń tehnıkalyq jaı-kúıine baǵalaý júrgizý jónindegi komıssııanyń otyrysyn ótkizdi.
Memlekettik organdardyń basshylary, «Aqtóbe Grajdanproekt» jobalyq-merdigerlik uıymdardyń, avtorlyq jáne tehnıkalyq qadaǵalaýlardyń ókilderi qatysty.
Jumys algorıtmi jasaldy. Barlyq múddeli organdarǵa naqty tapsyrmalar berildi.
«14 sáýirde turǵyndar eki úıdiń jaı-kúıine alańdap, turǵyn úı ınspektsııasy bólimine júgindi. Sol kúni merdigerlik uıym, avtorlyq jáne tehnıkalyq qadaǵalaý ókilderiniń qatysýymen mamandar baryp qarady. №40 úıdiń búkil perımetri boıynsha irgetas bloktarynyń aıtarlyqtaı jaryqtary men deformatsııasy anyqtaldy. №39 úıdi tekserý kezinde jertóleniń ishki qabyrǵalarynyń sylaqtary jarylǵany baıqaldy jáne irgetas bloktarynda syzat paıda bolǵany úıdiń syrtynan kórindi. Eki úıdi vızýaldy tekserý aktisi jasaldy. Ol boıynsha úılerdiń qurylymdyq elementterine saraptama júrgizý qajettiligi týraly qorytyndyǵa keldik. Úıdiń jaǵdaıyn anyqtaý úshin maıaktar ornatyldy jáne turaqty kezekshilik belgilendi», - dedi J.Áýbákirov.
Eki úı de Eset batyr turǵyn alabynyń birinshi shaǵynaýdanynda ornalasqan. Eki úıde 48 páter bar.
«Saraptama qorytyndysy shyǵarylǵanǵa deıin atalǵan eki úıdiń turǵyndary turǵyn alaptyń 1 jáne 3 shaǵyn aýdandarynda ornalasqan basqa úılerge kóshiriledi. Saraptama qorytyndysynan keıin naqty sheshim qabyldanady»,-dep habarlady qala ákiminiń baspasóz jetekshisi Aıgúl Baımenova.
