Aqtóbede ınsýlt alǵan qarııany kelini qańǵybastar úıine tastap ketti
AQTÓBE. QazAqparat - Aqtóbe oblystyq belgili turaǵy joq jáne qylmystyq jazasyn ótegen tulǵalardy beıimdeý ortalyǵyndaǵy turǵyndar sany kún ótken saıyn artyp keledi. Olardyń arasynda kelini esik aldyna tastap ketken qarııa da bar, dep habarlaıdy QazAqparat tilshisi.
Aqtóbedegi belgili turaǵy joq jáne qylmystyq jazasyn ótegen tulǵalardy beıimdeý ortalyǵynda kún ótken saıyn adam sany kóbeıip keledi. Mundaǵy turǵyndardyń 15-i uzaq ýaqyttan beri qujattaryn retteý úshin júr. Qujattary daıyn bolǵan soń olar jumysqa turyp, keıbiri otbasymen qaıta qaýyshyp jatady. Balasynyń, baýyrynyń janyna qaıta oralatyndar óte az.
«Qańǵybastardyń qalada kóbeıip ketýinde esh qupııa syr joq. Aýyldan qalaǵa jumys izdep keledi. Taba almaǵan soń kóshe kezip, tapqanyn tamaq etip ishedi. Arasynda ishimdikke salynǵandary basym. Joly bolmaǵandar basqa adamdardy kinálaýǵa beıim. «Meni úıimnen qýyp jiberdi», «balam barymdy tartyp aldy» dep aıtatyndar bar. Qysta óte kóp keledi. Bir túnde 28 adam keldi»,- dedi ortalyq dırektory Sabyrǵalı Dáýletov.
Munda qazir 60-qa jýyq adam bar. Kóbi kóshe kezip, dalaǵa túneýdi, qysta ortalyqty panalaýdy ádetke aınaldyrǵan. Keıbiri qujattaryn túgeldeý úshin ortalyq mamandarynyń kómegine júginedi.
«Ortalyqqa qazan aıynda kelip, qazir qujattarymdy qaıta qalpyna keltirip jatyrmyn. Kelinshegim qaza bolyp, eki balam úılendi. Ózim 70 jasqa tolamyn. Buǵan deıin mal baǵyp, aýylda júrdim. Endi kúshim ketti. Sondyqtan qujattarymdy qaıta qalpyna keltirip, qarttar úıine ornalasqym keledi. Balalarymnyń otbasyna aralasyp, kedergi keltirgim kelmeıdi», - dedi ortalyq turǵyny Abaı Sarjalın.
Ortalyqta Reseı, Ózbekstannan kelgen adamdar da jatyr. Keıbiri týǵan jerin, jylyn, týystaryn bilmeıdi. Ondaı adamdarǵa qujattaryn qaıta jasatý múmkin bolmaı tur. Al keıbirin týǵan-týystary ákelip tastap jatyr.
«Balasy, qyzy, apasy, inisi bar qarııany esik aldyna kelini ákelip tastady. Biz ony emdetý úshin aýrýhana jiberdik. Sebebi, ınsýlt alyp, tósekke tańylǵan. Bálkim minezi nashar shyǵar, biraq baǵý kerek. Ony jýyndyryp, kútim jasaý ortalyq qyzmetkerleriniń mindetine kirmeıdi. Qala kóshesindegi múgedekti, qozǵala almaıtyn adamdy bizge ákeledi. Ákelgen soń biz ony qýyp jibere almaı, qabyldaımyz», - ortalyq dırektory Sabyrǵalı Dáýletov.
Altynaı Saǵyndyqova
