Aqtóbede ıisshil ıtterge arnalǵan oqý-jattyǵý bastaldy
AQTÓBE. QazAqparat – Aqtóbede kınologtar men ıisshil ıtterge arnalǵan oqý-jattyǵý bastaldy. Oǵan 49 kınolog pen 46 qutqarýshy ıt qatysyp jatyr, dep habarlaıdy QazAqparat tilshisi.
Málik Ǵabdýllın atyndaǵy azamattyq qorǵaý akademııasynyń óńirlik oqý ortalyǵy bazasynda oqý-jattyǵý jıynynyń ashylýy ótti.
Sharanyń maqsaty – TJM qutqarý bólimsheleriniń kınologııalyq eseptoptarynyń daıyndyq deńgeıin anyqtaý, sondaı-aq kásibı daǵdylardy jetildirý, tabıǵı jáne tehnogendik sıpattaǵy tótenshe jaǵdaılar kezinde izdestirý-qutqarý jumystaryn júrgizýdiń qazirgi zamanǵy ádisterimen tájirıbe almasý.
Oqý-jattyǵýǵa elimizdiń aımaqtarynan 49 kınolog pen 46 qutqarýshy ıt qatysyp jatyr. Tórt aıaqty qutqarýshylardyń kóbi – labradorlar, nemis jáne belgııalyq ovcharkalar.
Aqtóbe oblysy TJD bastyǵynyń orynbasary Qaırat Qasymnyń aıtýynsha, osy tuqymdas ıtter tótenshe jaǵdaılarda jumys isteý úshin qolaıly.
«Óskemennen 4 ıt ákeldik. Barlyǵy 2,5 myń shaqyrymdy artqa tastap, osy óńirge jettik. Úsh táýlik boıy júrdik. Itter bárine úırengen, kólik arnaıy osy janýar úshin jabdyqtalǵan. Munda tájirıbe jınaımyz. Joǵalǵan, úıindi astynda qalǵan adamdy izdeýge mashyqtanǵan ári qaraı da shyńdala túsemiz», - dedi ShQO TJD Kınologııa bóliminiń bastyǵy Natalıa Drojjına.
Qutqarý jasaqtary kınologtarynyń respýblıkalyq oqý-jattyǵý jıyny tórt kúnge sozylady.
