Aqtóbede ıgerilýi tıis 865 myń gektar jerdiń 506 myń gektaryna dándi daqyl egiledi

AQTÓBE. KAZINFORM - Egis naýqanyna 49 myń tonna tuqym qajet bolsa, onyń 90% daıyndaldy. Kóbi birinshi synypty tuqym.

Aqtóbe oblysynda kóktemgi dalalyq jumystarǵa daıyndyq júrip jatyr. Bıyl 865 myń gektar jerdi ıgerý josparlanǵan. Onyń 506 myń gektaryna dándi daqyl egiledi. Mal azyǵynyń kólemi 277 myń gektardy quraıdy. Sonymen birge maıly daqyldyń aýdany 75 myń gektarǵa jetpek.

- Egis naýqanyna 49 myń tonna tuqym qajet. Búginde 44 myń tonna tuqym qambaǵa quıyldy. Onyń 71% birinshi synypty, 21% ekinshi synypty jáne 8% úshinshi synypty. Jetpeı turǵynyn sharýashylyqtar satyp alady. Búgingi tańǵa 707 tonna dándi daqyl jáne 20 tonna kartop tuqymyn satyp alýǵa kelisimshart jasaldy. Egis jumystary bastalǵanǵa deıin tolyq qamtýǵa múmkindik bar,- dep habarlady Aqtóbe oblystyq aýyl sharýashylyǵy basqarmasy.

Bıyl dalalyq jumystar kezinde 1,5 myń traktor, 100-den astam egis kesheni, 1,4 myń dánsepkish jáne 1,8 myń jer óńdeıtin tehnıka qoldanylady. Qazirgi kezde tehnıkanyń 90% ázir tur.

- Egis jumystaryna 7,9 myń tonna arzandatylǵan dızel otyny bólindi. Bıýdjetten ósimdik sharýashylyǵyn sýbsıdııalaýǵa 2,1 mlrd teńge qarastyryldy. «Keń dala-2» baǵdarlamasy aıasynda kóktemgi egis jáne kúzgi egin jınaý jumystaryn qarjylandyrý maqsatynda jyldyq ústemeaqysy 5% nesıe berý jumysy jalǵasyp jatyr. Búginde 1,7 mlrd teńge nesıe berildi,- dep habarlady Aqtóbe oblystyq aýyl sharýashylyǵy basqarmasy.

Bıyl Aqtóbede 160 myń gektar jer shegirtkege qarsy óńdeledi.

Aıta keteıik, elimizde 1879 dıqan erte qarjylandyrý arqyly egis jumystaryna kiristi.