Aqtóbede ıgerilmegen 36,6 myń gektar jer telimi memleketke qaıtaryldy
ASTANA. KAZINFORM — Aqtóbe oblysynda uzaq ýaqyt boıy paıdalanylmaǵan 36,6 myń gektar aýyl sharýashylyǵy maqsatyndaǵy jer ýchaskesi sot sheshimimen memleket menshigine qaıtaryldy. Jer zańnamasynyń talaptaryn oryndamaǵan jer paıdalanýshyǵa qatysty talap-aryzdy Jer resýrstaryn basqarý departamenti sot arqyly qanaǵattandyrdy. Bul týraly AShM málim etti.
Aýyl sharýashylyǵy mınıstrligi Jer resýrstaryn basqarý komıtetiniń Aqtóbe oblysy boıynsha Jer resýrstaryn basqarý departamenti aýyl sharýashylyǵy maqsatyndaǵy jerlerdi utymdy paıdalanýdy qamtamasyz etý jáne paıdalanylmaı jatqan jerlerdi memleket menshigine qaıtarý baǵytyndaǵy jumystardy jalǵastyryp otyr.
— Jospardan tys tekserý barysynda aýyl sharýashylyǵy taýaryn óndirýshilerdiń birine tıesili Shalqar aýdanynda ornalasqan jalpy aýdany 36 600 gektar aýyl sharýashylyǵy maqsatyndaǵy jer teliminiń uzaq ýaqyt boıy nysanaly maqsatyna saı paıdalanylmaǵany anyqtaldy, — delingen habarlamada.
Zań buzýshylyqtardy joıý maqsatynda jer teliminiń ıesine jer zańnamasy talaptaryn oryndaý týraly nusqama berildi. Alaıda belgilengen merzimde nusqama talaptary oryndalmady.
Osyǵan baılanysty Departament aýyl sharýashylyǵy maqsatyndaǵy jer ýchaskesin májbúrlep alyp qoıý týraly talap-aryzben Aqtóbe oblysynyń mamandandyrylǵan aýdanaralyq ekonomıkalyq sotyna júgindi.
— Sot talqylaýynyń qorytyndysy boıynsha talap-aryz tolyq kólemde qanaǵattandyryldy. Sot sheshimi negizinde atalǵan jer ýchaskesi májbúrlep alynyp, memleket menshigine qaıtaryldy, — dep habarlady vedomstvodan.
Aýyl sharýashylyǵy maqsatyndaǵy paıdalanylmaı jatqan jerlerdi anyqtaý jáne olardy memleket menshigine qaıtarý jumystary jalǵasýda jáne turaqty baqylaýda.
Atyraý oblysynda 619 mıllıon teńgeniń jeri memleketke qaıtaryldy.
