Aqtóbede ıesiz qalǵan munarany bólshektep alýǵa ákimdiktiń kúshi jeter emes
AQTÓBE. QazAqparat - Aqtóbe qalasynyń irgesindegi Qarǵaly aýyldyq okrýginiń turǵyndary qatty jel soqqan kúni uıyqtamaıdy. Sebebi, ıesiz qalǵan 35-40 metrlik munara qulaıyn dep tur, dep habarlaıdy QazAqparat tilshisi.
Aqtóbe qalasy, Qarǵaly aýyldyq okrýginiń turǵyndary birneshe jyldan beri ákimdikten kómek kútip júr. Biraq eki úıdiń ortasyndaǵy munarany qıratýǵa qarapaıym adamdardyń ǵana emes, ákimdiktiń kúshi jeter emes.
«Bizdiń úıimizdiń janynda ıesiz munara bar. Metaldy qurastyrmanyń baspaldaǵy bar, joǵarǵy jaǵynda temir qurylǵy tur. Janynda joǵary voltty elektr toǵy, gaz qubyry tur. Úıimiz de sonyń irgesinde. Osydan 10 jyl buryn ákimdik munaradaǵy symnyń bárin alyp, qıratýǵa daıyndap edi. Keıin jumys toqtap qaldy. Qatty jel soqqan kúni Allaǵa syıynyp, uıyqtamaı shyǵamyz. Eger úıimizge qulasa, bárimiz mert bolamyz. Munarany qıratý úshin mindetti túrde bir qaıǵyly jaǵdaı bolýy kerek pa? Bizge kómektesińizdershi», - deıdi Qylyshbaı Otjaǵar.
Qarǵaly aýyldyq okrýgine jaýapty ákim Almas Álimbaev turǵynnyń saýalyna jan-jaqty jaýap bergen. Biraq ákimdik munarany qırata almaı, qala ákimdiginen kómek suraǵan.
«Ákimdik tarapynan Aqtóbe qalalyq tótenshe jaǵdaılar departamentine munarany bólshektep alýǵa kómek suraǵanbyz. Biraq jaýapta munarany alýǵa tehnıkalyq múmkindik joq ekenin habarlady. Sonymen birge Aqtóbe qalasynyń ákimdigine de hat joldandy. Osyǵan oraı munarany tıisti jaǵdaıǵa keltiretin nemese bólshektep alatyn ıesi tabylmaýyna baılanysty bul jumystardy atqarýǵa Qarǵaly aýyldyq okrýginiń múmkindigi joq ekenin habarlaımyn», - dep jazylǵan aýyldyq okrýg ákimi Almas Álimbaevtyń jaýabynda.
