Aqtóbede І top múgedegi JOO oqý grantyna ıe boldy
AQTÓBE. QazAqparat - Aqtóbe oblysynyń ákimi Berdibek Saparbaev І top múgedegi Injıfııa Kalıkovaǵa tegin bilim alý quqyǵyn beretin grantty syılady, dep habarlaıdy QazAqparat tilshisi.
Búgin Aqtóbe qalasynda Halyqaralyq balalardy qorǵaý kúnine arnalǵan merekelik baǵdarlamalar uıymdastyryldy. Balalar sporttyq oıyndarǵa qatysyp, kontserttik baǵdarlamalardy tamashalady. Al bul kún taıaýda mektep bitirgen Injıfııa Kalıkova úshin erekshe kún boldy. Ol Qudaıbergen Jubanov atyndaǵy Aqtóbe memlekettik óńirlik ýnıversıtetinde tegin oqýǵa múmkindik aldy.
«Q.Jubanov ýnıversıtetiniń shetel tilderi fakýltetine oqýǵa tústim. Ózim qalap, armandap, sol armanǵa qol jetip otyr. Aǵylshyn tilin tańdadym», - dedi Injıfııa Kalıkova.
І top múgedegi Injıfııa Kalıkovaǵa №23 orta mekteptiń muǵalimderi sabaq bergen. Al óz armany týraly QR Memlekettik qyzmet isteri jáne sybaılas jemqorlyqqa qarsy kúres is-qımyl agenttiginiń oblystyq departamenti uıymdastyrǵan kezdesý kezinde aıtqan. Aýdarmashy bolýdy armandaǵan túlek «Qudaıbergen Jubanov atyndaǵy grantyn» ıelendi.
Sondaı-aq, «Baqytty balalyq shaq» festıval-konkýrsyna qatysqan Ahmet Aqnıet aldaǵy kúnderi Ahmet Jubanov atyndaǵy mýzykalyq kolledjde tegin bilim alady. Oıyl aýdany Janııa Júsibalıev atyndaǵy qazaq orta mektebiniń túlegi «Qazaqstan balalary sheksiz álemde» beınerolıkter baıqaýyna qatysyp, jeńimpaz atanǵan. Sonymen qatar, respýblıkalyq Abaı, Shákárim oqýlarynda jeńimpaz boldy. Ol da kolledjde tegin oqýǵa múmkindik beretin grantty ıelendi.
