Aqtóbede І top múgedegi jabyq aıaldama jasaý jobasyn ákimge usyndy

Aqtóbe qalasy úshin aıaldama máselesi ótkir bolyp tur. Sebebi turǵyndar quny 1,5 mıllıon teńgege baǵalanǵan aıaldamalardyń jelden, kúnnen, jańbyrdan qorǵamaıtynyn aıtyp, shaǵymdanyp jatyr. Al jergilikti bılik qalanyń ortalyq kóshelerindegi aıaldamalardyń estetıkaǵa saı ekenin alǵa tartyp otyr .   Aqtóbe aglomıratsııasy týraly aıtylǵan jıynǵa daıyndalyp kelgen І top múgedegi Bolat Halyqbaev qala ákimi Іlııas Ispanovqa jabyq aıaldama jobasyn usyndy.

«Aqtóbe qalasyndaǵy aıaldamalar elimizdiń ońtústik óńiri úshin óte yńǵaıly. Qysy qatty Aqtóbe óńiri úshin aıazdy kúni jyly bolatyn aıaldama kerek. Men jańa jobany úsh aı boıy daıyndadym. Aıaldamada dárethana, salqyndatqysh bolady. Qysta jyly, jazda salqyn aıaldamanyń quny 4 mıllıon teńge. Muny qymbat dep aıtýy múmkin. Biraq bir dárethana úshin 1,5 mıllıon teńge jumsap, ortalyqtandyrylǵan káriz júıesine qosýdy josparlaımyz. Bul aıaldama óz-ózin aqtaıdy. Ári qaýipsizdik úshin beınebaqylaý ornatylady. Bul jerge barlyǵy 30 adam sııady. Kútý zalyna birneshe oryndyq qoıylady», - dedi kásipker Bolat Halyqbaev.
 

Aıaldamaǵa turyp, qoǵamdyq kólikke otyratyn qala turǵyny qystyń aıazynda avtobýs kútý óte qıyn ekenin jasyrmady.

І top múgedegi týabitti sal aýrýyna shaldyqqan. Eki baldaqpen júretin jas jigit bos otyrmaıdy. Dızaın jasap, tyń ıdeıalardy qaǵazǵa túsiredi. Buǵan deıin ol birneshe start-ap jobalaryn usynyp, baıqaýlarǵa qatysty. Qazir dárihana, aýrýhana, áleýmettik nysandardaǵy bahıl qorabyn tolyqtyryp júr. Bul jumys asa qıyn emes, biraq qosymsha tabys bola alady.

«Men botanıkalyq baq ashqym keledi. Aqtóbelikter bizdiń usynysymyzdy qoldaıdy dep esepteımin. Jobalarymdy kásipkerlerge aparyp kórsetken emespin, biraq baıqaýlarǵa qatystym. Jańa, tyń jobalarǵa ákimdik qyzyǵýshylyq tanytsa, iske asyrýǵa múmkindik bar», - dedi Bolat Halyqov.