Aqtóbede hrom óndiretin kásiporynǵa 2,9 mlrd teńge aıyppul salyndy

ASTANA. KAZINFORM - Aqtóbeniń tabıǵat qorǵaý prokýrorlary «Voshod Hrom» JShS Hromtaý aýdanynda hrom kenin óńdeý kezinde zań buzýshylyqqa jol bergenin anyqtady. Atap aıtqanda, kásiporyn 2022 jyl ishinde mindetti ekologııalyq ruqsatsyz jumys istegen, dep habarlaıdy oblystyq prokýratýranyń baspasóz qyzmeti. 

Tıisinshe, osy kezeńdegi barlyq emıssııalar, bul atmosferaǵa 52 tonnadan astam lastaýshy zattardyń shyǵaryndylary (beıorganıkalyq shań, 3 valentti hrom, magnıı oksıdi jáne t.b.), sondaı-aq jalpy 395 myń tonna kóleminde ornalastyrylǵan iri kesek jáne shlamdy baıytý qaldyqtary normatıvten joǵary, ıaǵnı zańsyz dep tanyldy.

Tabıǵat qorǵaý prokýratýrasynyń sharalarymen kásiporynǵa ekologııalyq ruqsatsyz qyzmetti júzege asyrǵany úshin, 2,9 mlrd teńgeden astam somaǵa aıyppul salyndy.

Seriktestik ákimshilik jaýapkershilikke tartý týraly qaýlyǵa sot tártibimen shaǵym jasaldy.

Oblystyq sottyń birinshi jáne apellıatsııalyq satylary aıyppuldy zańdy dep tanydy.