Aqtóbede hrom qosyndylary zaýytynyń ónimine ishki naryqta suranys az
AQTÓBE. QazAqparat - Aqtóbe hrom qosyndylary zaýytynda ujymdyq kezdesý ótti. Zaýyt basshysy Alekseı Hımıchtiń aıtýynsha, ónimniń basym bóligi alys shetelge satylady, al ishki naryqta suranys az, dep habarlaıdy QazAqparat tilshisi.
Aqtóbe hrom qosyndylary zaýytynda kezekti ujymdyq kezdesý ótti. Kalıı, natrıı bıohromıti sekildi birneshe hımııalyq zattardy shyǵaratyn zaýytta 2 myńnan astam adam jumys isteıdi. Bıyl taǵy 68 adamdy jumysqa qabyldap, óndiris kólemin saqtap qalýǵa ýáde berip otyr. 2018 jylǵa 100 kelisimshart jasaldy. Shamamen 100 myń tonnadan astam ónim shyǵarylsa, onyń basym kópshiligi Japonııa, AQSh sekildi damyǵan memleketterge jóneltiledi. Mundaǵy Qazaqstan suranysy 948 tonnany qurap otyr.
«Bizdiń basty qıyndyǵymyz, kemshiligimiz, ishki naryq suranysy tym az. Óńdelgen ónimniń bári shetel asyp jatyr. Sonymen qatar, shıkizat baǵasy álem naryǵymen teńestirilip, dollarmen satylady. Ótken jyly 1 tonna shıkizatty 339 dollarǵa satyp aldyq. «Voshod Orıel» kompanııasy baǵany ózgertip, keıbir satyp alýshylar ónimimizden bas tartyp otyr. Biraq óndiris kólemi sol kúıi saqtaldy», - dedi «Aqtóbe hrom qosyndylary zaýyty» AQ basqarma tóraǵasy Alekseı Hımıch.
2018 jyly zaýytqa 2 mıllıard teńge ınvestıtsııa salyp, óndiristi jańǵyrtý jumysy júrgiziledi. Aqtóbe oblysynyń ákimi Berdibek Saparbaev ujymmen kezdesý kezinde ekologııalyq jaǵdaıdy jaqsartý maqsatynda atqarylatyn jumystar kestesin bildi.
«Zaýyt reseılik jańa tehnologııalardy engizip, qaladaǵy jaǵymsyz ıisti joıý úshin jumys isteýi kerek. Zaýyt mańyndaǵy aýyldarda 600-den astam otbasy turady. Úkimetke aýyl turǵyndaryn kóshirý týraly usynys aıtyldy. Bul ońaı jumys emes. Osy isti sheshý úshin Aqtóbe hrom qosyndylary zaýyty men Aqtóbe ferroqorytpa zaýyty kómek berýi qajet dep esepteımiz», - dedi Aqtóbe oblysynyń ákimi Berdibek Saparbaev.
Al jergilikti bılik óz tarapynan káriz sýyn tógý stantsııalaryn jańartyp, úsh beketti ashty. Eýropalyq qaıta qurý jáne damý bankimen birge sýdy tazartý qurylǵysy da qondyrylady. Al kólikter suıytylǵan gazben júredi.
Kezdesý kezinde oblys ákimdigi, kásipodaq pen zaýyt basshylyǵy úshjaqty memorandýmǵa qol qoıdy. Kelisimge sáıkes jumysshylardyń jalaqysy ósýi tıis.
«Zaýytta jalaqy 10 paıyzǵa deıin kóterilýi kerek. Qazir óńirdegi kez kelgen óndiris, shaǵyn jáne orta bızneske osy talapty qoıyp otyrmyz», - dedi Berdibek Saparbaev. 
