Aqtóbede hokkeı modýli men balabaqsha paıdalanýǵa berildi
Aqtóbelik balalar men jasóspirimder endi hokkeı oınaı alady. Búgin qala ortalyǵynan hokkeı modýli paıdalanýǵa berildi. Elbasynyń «Týǵan jer» jobasyn iske asyrý maqsatynda aǵaıyndy Şegelskııler jańa muz aıdynyn tartý etti. Qurylys jumystary 2016 jyly bastalǵan bolatyn.
«Balalar men jasóspirimderdi sport, ónerge baýlyp, olardyń sapaly bilim alýyna bar jaǵdaı jasalyp jatyr. Elbasy Nursultan Nazarbaevtyń bastamasymen elimizde birneshe áleýmettik joba, baǵdarlama qolǵa alynyp, iske asyrylýda. Sonyń nátıjesinde búgin Aqtóbede hokkeı modýli paıdalanýǵa berildi. Mundaı nysan táýelsizdik jyldary óńirde salynbaǵan. Meniń oıymsha, aqtóbelikter qysqy sport túrleri boıynsha jaqsy nátıjege qol jetkize alady. Sportshylarǵa barlyq jaǵdaı jasalsa, olardyń arasynan chempıondar shyǵady»,- dedi oblys ákimi Berdibek Saparbaev.
Jańa hokkeı modýlinde short-trek pen mánerlep syrǵanaý sporty da damıtyn bolady. Halyqaralyq talapqa saı salynǵan muz aıdynynyń qurylysyna reseılik mamandar atsalysqan. Olar 2014 jyly Sochıdegi qysqy sport túrleriniń Olımpıadasyna arnalǵan keshen qurylysyn júrgizgen mamandar eken. Joba quny - 544 mıllıon teńge. «KTP» JShS-niń basshylary aǵaıyndy Şegelskııler jańa sport nysanyn oblys ákimdigimen birge júrgizdi. Sport nysanynyń ashylýy kezinde óńir ákimi Berdibek Saparbaev oblystyq máslıhat depýtaty, kásipker Vsevolod Şegelkııge alǵys hat berip, Májilis depýtaty Gleb Şeshelkııge «Oblysqa sińirgen eńbegi úshin» tósbelgisin taqty.
Aıta keteıik, Aqtóbede Halyqaralyq balalardy qorǵaý kúni 300 oryndy balabaqsha paıdalanýǵa berildi. Buryn «Kúzet» kúzetý mekemesiniń ǵımaraty bolǵan nysandy kásipker 5 jylǵa jalǵa alyp, 190 mıllon teńgege jóndeý júrgizgen. Aldaǵy ýaqytta memlekettik tapsyrysty oryndap, balalardy tárbıeleıdi. Balabaqshada 25 top bolady. Olarǵa arnalǵan sport zaly, mýzyka bólmesi men logoped, psıhologtar kabıneti qarastyrylǵan.
«Aqtóbe qalasynda memlekettik-jeke menshik áriptestik aıasynda balabaqshalar salynatyn bolady. Bıyl 11 jer telimi satyldy. Keler jyly taǵy 15 jer telimi beriledi. Osy arqyly biz 2020 jyly balalardy tolyq baqshamen qamtamasyz etemiz»,- dedi qalalyq bilim bóliminiń basshysy Indıra Beksultanova.
