Aqtóbede hımııa zaýyty aýmaǵyndaǵy qaldyqtyń qaıda tasymaldanyp jatqany belgisiz
AQTÓBE. KAZINFORM – Alǵa hımııa zaýyty aýmaǵynda jańa bir úıindi paıda boldy. Ekologtar jerdi qazǵan kompanııa basshylyǵyn izdep, kezdesýge shaqyrdy.
Alǵa aýdanynyń ákimi Aslanbek Shúıinshalıevtiń aıtýynsha, Alǵa hımııa zaýyty aýmaǵynda úıindilerdiń paıda bola bastaǵanyna búginde bir aıǵa jýyqtaǵan. Alǵashqy kúni-aq polıtsııa, prokýratýraǵa habar bergen. Olar óz kezeginde ekologtarǵa aıtty. Oblystyq polıtsııa departamenti baspasóz qyzmetiniń aıtýynsha, polıtsııaǵa túsken habarlamadan soń málimet ekonomıkalyq tergep-tekserý departamentine jiberilgen.
- Zaýyttyń burynǵy terrıtorııasynda jerdi qazyp alyp, ony temirjol aýmaǵyna úıgen. Sol jerden vagonǵa tıep, alyp ketip jatyr. Basqa jerge tasýdy bastaǵan. Reıd kezinde baryp, jumysshylardan qandaı mekeme ekenin suradyq. Qujaty bar ekenin, basshylar habarlasatynyn aıtqanymen, bir aı ótse de eshkim kelmedi. Biz polıtsııaǵa naqty anyqtap berýdi suradyq,- dedi Aqtóbe oblystyq ekologııa departamenti basshysynyń orynbasary Talap Usnadın.
Onyń aıtýynsha, zaýyt jabylǵan soń aýmaq QR Ekologııa jáne tabıǵı resýrstar mınıstrligi «Jasyl damý» AQ-na berilgen. Oblystyq ekologııa departamenti eskertýinen soń «Jasyl damý» AQ-nan mamandar kelip, akt toltyrdy.
- Kimge kerek, kim alyp jatqanyn ózimiz de bilmeı turmyz. Jumysshylardyń aıtýynsha, «BG Development Co» JShS-i eken. Telefon nómirin taýyp alyp, dúısenbi kúnge keńsege shaqyrttyq. Sol kezde naqtysy belgili bolady,- dedi Talap Usnadın.
Aıta keteıik, Alǵa hımııa zaýyty Elek ózenin bormen lastap jatyr. Qala irgesindegi alyp óndiris oshaǵy búginde alyp qoqys alańyna aınalǵan. Buǵan deıin Kazinform turǵynmen, depýtattarmen, ekologtarmen sóılesip, 730 myń tonna bolatyn qoqysty tazartý jolyn surady.
Mınıstrlik S. Kırov atyndaǵy burynǵy Alǵa hımııa zaýytynyń aýmaǵynda ornalasqan qaýipti qaldyqtardy joıý jobasyn túzetý jáne joıý jumystaryn júrgizý 2025-2026 jyldarǵa qarastyrylǵanyn málimdedi.