Aqtóbede Heriot-Watt ýnıversıtetiniń 107 stýdenti ekinshi kýrsqa kóshpeı qaldy
AQTÓBE. KAZINFORM - Aqtóbede Heriot-Watt ýnıversıtetiniń 107 stýdenti ekinshi kýrsqa kóshpeı qalyp, ata-analar óz talabyn qoıdy. Olar balalaryn Q.Jubanov óńirlik ýnıversıtetiniń grantyna qabyldaýdy surap otyr.
Aqtóbede Heriot-Watt ýnıversıtetiniń ekinshi kýrsyna kóshpeı qalǵan stýdentterdiń ata-analary óz talabyn qoıdy. Olar bıyl 23 tamyzda ǵana ata-analarǵa habar berilgenin, bir jyl ýaqyty bosqa ketkenin aıtyp shaǵymyn jetkizdi.
- Byltyr «balańyz oqýǵa tústi, quttyqtaımyz» degen habarlama aldyq. Al bıyl 23 tamyz kúni saǵat 16:00-17:00 aralyǵynda 107 balaǵa «siz ekinshi kýrsqa ótpedińiz» degen habarlama túsken. Balalarymyzdyń bilim sapasy jóninde nege birinshi kýrstiń birinshi semestrinde esketpedi? Sol kezde erterek qamdanar edik. Basqa JOO-ǵa alyp ketýge de ýaqyt bolar edi. Osy oqý ornyna qabyldanǵan kezde 50 ball jınaǵan talapkerdiń bári qabyldandy. Eki dıplom beredi dedi. Sodan ózge granttan bas tartyp, osynda keldik. Q.Jubanov óńirlik ýnıversıtetiniń rektorymen kezdeskende tek ekinshi kýrsty osy ýnıversıtette tegin oqıtynyn, ári qaraı aqyly ekenin bildik. Biraq biz 4 jyl boıy grant bolǵanyn qalaımyz. Balalarymyz aýyldan keldi, aǵylshyn deńgeıi birdeı emes. Birinshi kýrsta ǵana tildi meńgerdi, ekinshi semestrde barlyq pán aǵylshyn tilinde ótti. Eger bizdiń balalarymyz sabaqty alyp kete almasa, oqytýshylardyń da sapasy nashar bolǵan shyǵar, - dedi Jámıla Qazmaǵambetova.
Q.Jubanov atyndaǵy ýnıversıtettiń baspasóz qyzmetiniń habarlaýynsha, qazirgi tańda 107 stýdenttiń 70-ten astamy Q.Jubanov ýnıversıtetiniń ekinshi kýrsyna tegin oqýǵa múmkindik beretin bilim berý baǵdarlamalaryna aýysýǵa ótinish jazdy. Bul stýdentter Heriot-Watt ýnıversıtetiniń akademııalyq standarttarynyń talaptaryna saı kelmeı, kelesi kýrsqa ótpedi.
- 2023 jyly 500-den astam adam memlekettik grant baıqaýyna qatysýǵa ótinish bildirdi. Onyń 300-i UBT-da jınaǵan balynyń nátıjesinde memlekettik grantqa ıe boldy. Shekti baly – 50. Bul elimizdiń ár óńirinen kelgen jáne ár túrli turǵyndar sanatyna jatatyn talapkerlerge bilim grantyn alýǵa múmkindik berdi. Sonymen qatar aǵylshyn tilin bilýdiń belgili bir deńgeıi qosymsha talap etildi. Aǵylshyn tilinen arnaıy emtıhandy Heriot-Watt ýnıversıtetiniń ókilderi júrgizdi. Birinshi semestr tolyǵymen aǵylshyn tilin oqytýǵa arnaldy. Ekinshi semestrde stýdentter aǵylshyn tilin meńgerýmen qatar tıisti mamandyqtarǵa sáıkes (fızıka, matematıka, hımııa nemese ınformatıka) bazalyq pánderdi oqydy. Oqý barysynda stýdentter men olardyń ata-analaryna oqý úlgerimi týraly habarlamalar birneshe ret taratyldy. Ekinshi semestrdiń qorytyndy baǵasy tamyz aıynyń birinshi onkúndiginde Heriot-Watt portalyna shyqty. Sol ýaqytta stýdentterdiń basqa ýnıversıtetke aýysýyna múmkindik boldy. Shekti balǵa qol jetkize almaǵan stýdentterge emtıhandy qaıta tapsyrýǵa múmkindik berildi. Barlyq emtıhan muqııat tekserýden ótti jáne stýdentterdiń qorytyndy baǵalary 23 tamyz kúni Heriot-Watt ýnıversıtiniń saıtynda jarııalandy. Osylaısha stýdentterdiń akademııalyq jaǵdaıyn túzetýge nemese basqa bilim berý baǵdarlamalaryna aýysýyna múmkindik boldy. Birinshi oqý jylynyń qorytyndysy boıynsha Edınbýrg qalasyndaǵy Heriot-Watt ýnıversıtetiniń ǵylymı keńesi Aqtóbe kampýsyndaǵy 200-ge jýyq stýdentti ekinshi kýrsqa aýystyrý týraly sheshim qabyldady. Bul stýdentterdiń kópshiligi baǵdarlamany meńgerip, bilim deńgeıin rastaı aldy. Oqý úlgerimi nashar stýdentterdi oqýdan shyǵarý barlyq joǵary oqý oryndarynda qalypty úrdis, - dep habarlady Q.Jubanov atyndaǵy ýnıversıtettiń baspasóz qyzmeti.
Eske salsaq, byltyr Aqtóbede álemniń jetekshi ýnıversıtetteriniń biri Herıot-Ýott ýnıversıtetiniń (Heriot-Watt University) fılıaly ashyldy. Joǵary oqý orny óz jumysyn Q.Jubanov atyndaǵy Aqtóbe óńirlik ýnıversıteti men Herıot-Ýott ýnıversıtetiniń yntymaqtastyǵy aıasynda bastady.
