Aqtóbede Harmony Rider Technology qarjy pıramıdasyn uıymdastyrýshylar sottaldy
ASTANA. KAZINFORM – Aqtóbe qalasynda «Harmony Rider Technology» (HRT) qarjy pıramıdasyn qurý jáne oǵan basshylyq etý, sondaı-aq qylmystyq jolmen alynǵan qarajatty zańdastyrý faktileri boıynsha sot úkimi shyqty.
Tergeýdi QR Qarjy monıtorıngi agenttigi Aqtóbe oblysy boıynsha departamenti júrgizdi.
Vedomstvo málimetinshe, 2024 jyly bir top tulǵa ózin shetelde elektrosamokattardy satyp alyp, jalǵa berýmen aınalysatyn halyqaralyq kompanııa retinde tanystyryp, qarjy pıramıdasynyń jumysyn uıymdastyrǵan.
Naqtysynda salymshylarǵa tólenetin tabys jańa qatysýshylardan tartylǵan qarajat esebinen qalyptasqan.
- Azamattardy tartý maqsatynda áleýmettik jeliler men messendjerler arqyly jarnama júrgizilip, oflaın kezdesýler men tanystyrylymdar uıymdastyrylǵan. Zańdylyq kórinisin qalyptastyrý úshin Aqtóbe qalasynda keńse jalǵa alynyp, úgit-nasıhat jumystary júrgizilgen.
Salym somasy 350-den 20 000 AQSh dollaryna deıin bolǵan, al ýáde etilgen tabys táýligine 12-den 690 AQSh dollaryna deıin jetken.
Qarajatty zańdastyrý úshin kúdiktiler krıptoámııandar arqyly aqsha aınalymyn júrgizip, keıin ony aıyrbastap, bank shottaryna aýdaryp otyrǵan, - dep túsindirdi agenttikten.
Zańsyz áreketter nátıjesinde qarjy pıramıdasyna 115 salymshydan jalpy somasy 197 mln teńgeden astam qarajat tartylǵan.
Atalǵan qarajat esebinen uıymdastyrýshylar 3 avtokólik satyp alyp, onyń birin týysynyń atyna rásimdegen.
Sot úkimimen uıymdastyrýshylar 6 jylǵa deıin bas bostandyǵynan aıyryldy.
Sonymen qatar sot sheshimimen 3 avtokólik memleket kirisine tárkilendi.
Sot úkimi zańdy kúshine endi.
Aıta keteıik, buǵan deıin 380 adam Sirius Energy qarjy pıramıdasynyń qurbany bolǵany habarlandy.
