Aqtóbede halyqqa qyzmet kórsetý ortalyqtarynyń jumysy jandanady
AQTÓBE. QazAqparat - 4 mamyrdan bastap Aqtóbede halyqqa qyzmet kórsetý ortalyqtary jumysyn bastaıdy, dep habarlaıdy QazAqparat tilshisi.
Oblys ákimdigi janyndaǵy jedel shtabtyń habarlaýynsha, Aqtóbe qalasy men aýdandarda 4 mamyrynan bastap saǵat 10:00-den 17:00-ge deıin Halyqqa qyzmet kórsetý ortalyqtary jumys isteıdi. Tek bıznes ókilderine qyzmet kórsetedi. Aqtóbe qalasynda Týrgenev kóshesindegi jáne Mamandandyrylǵan halyqqa qyzmet kórsetý ortalyǵy alǵashqy tizimge engen.
«Tótenshe jaǵdaı kezigje 42 500 teńge áleýmettik tólemdi alýǵa 567 251 adam ótinish berdi. Eńbek jáne halyqty áleýmettik qorǵaý mınıstrligi 353 myńǵa jýyq ótinishti keri qaıtardy. Al 206 myńnan astam adam tólemaqy aldy. Qalǵan bóligine tólem júrgizilý ústinde. Al «Biz birgemiz» aktsııasy aıasynda 4347 otbasyna 40,4 mln teńge kólemindegi azyq-túlik paketi, gıgıenalyq quraldar, maska jáne aqshalaı kómek kórsetildi. Onyń ishinde: 1804 az qamtylǵan otbasyna, 115 jalǵyz basty anaǵa, 1365 kópbalaly otbasyna, 559 múgedekke, 220 múgedek bala tárbıelep otyrǵan otbasyna, 174 jalǵyzbasty jáne jalǵyz turatyn zeınetkerler men múgedekterge, 2 ata-ananyń qamqorlyǵynsyz qalǵan jetim balaǵa, 118 tyl ardagerleri men UOS ardagerleriniń jesirlerine zattaı jáne aqshalaı kómek kórsetildi jáne 120 myńnan astam maska taratyldy«, - dep habarlady jedel shtab.
Aıta keteıik, Call-ortalyqqa 21 039 suraq tústi. Túsken suraqtardyń barlyǵy tıisti memlekettik organdarǵa shara qabyldaý úshin joldandy. Psıhologııalyq kómek kórsetetin «Qyzý jelige» 153 adam qońyraý shaldy.
«Tótenshe jaǵdaı engizilgennen beri 1125 tártip buzýshylyq faktisi anyqtaldy. Onyń ishinde 238 adam qamaldy. 78 adam blokposttan zańsyz ótpek boldy»,- dedi oblystyq PD baspasóz qyzmeti.
