Aqtóbede halyq teatrlar festıvali ótti
AQTÓBE. QazAqparat - Aqtóbede halyq teatrlar festıvali ótti. Óner báıgesine aýdandardaǵy 9 halyqtyq ataǵy bar, eki áýesqoı teatr qatysty.
Aqtóbede «Teatr - ónerdiń uly kóshi» atty festıval boldy. Aýdan, aýyldaǵy 9 halyqtyq ataǵy bar, eki áýesqoı teatrdyń ártisteri men rejısserine aldymen Aqtóbeniń qurmetti azamattary men belgili tulǵalaryn dáriptep, olardyń shyǵarmashylyǵy men ómirine basa nazar aýdarý tapsyryldy. Sebebi, bıylǵy festıval oblystyń 85 jyldyǵy men Eset Kókiulynyń týǵanyna 350 jyl tolýyna, memlekettik rámizderdiń 25 jyldyǵyna arnaldy.
«Halyq teatrlarynyń jumysy ólsheýsiz. Birinshiden, ártisterdiń bári aýyldaǵy ónerge jaqyn adamdar. Ekinshiden, halyqtyń ataǵy bar teatrda tek eki qyzmetker jumys isteıdi. Áýesqoı teatrlar tek janashyrlardyń kúshimen tirlik etedi. Bul festıval óner adamdaryn qoldaýǵa, olardyń eńbegin baǵalaýǵa arnaldy»,- dedi oblystyq halyq shyǵarmashylyǵy úıiniń baspasóz hatshysy Gúlnar Seıtalına. 
Festıval kezinde «Shámshiniń áni» qoıylymy bas júldeni jeńip aldy. Qoıylym rejısseri Aınagúl Mýsına 2001 jyly Muǵaljar aýdandyq halyqtyq teatrdyń negizin qalaǵan. Qazir repertýarlarynda 15 qoıylym men spektakl bar.
«Qoıylym tańdalǵan soń keıipkerlerimniń minezine saı keletin adamdardy izdeımin. Kóbine aýdandyq mádenıet úıiniń ánshisi men bıshisin, basqa da halyqtyń toptyń múshesin shaqyramyn. Ózge salada jumys isteıtin adamdardyń bos ýaqyty az bolady. Keıde tájirıbe jınaýǵa kelip jatqan balalar sahnaǵa shyǵarylady»,- deıdi Aınagúl Mýsına. 
Onyń aıtýynsha, aýdandyq mádenıet úıindegi sahna teatrǵa laıyqty jasalmaǵan. Jaryq qoıylmaıdy, dybys ulǵaıtqysh quraldary talapqa saı kelmeıdi. Sondyqtan kórermen qoıylymdardan mol áser ala almaıdy. Teatr festıvaline bir aı boıy daıyndalǵan ujym bul eńbektiń, izdenýdiń jemisi ekenin jetkizdi.
«Qazaqtyń birtýar kompozıtorynyń minezi men bolmysyn meılinshe dál jetkizip, obrazdy ashý úshin ol Shámshiniń ánderin tyńdap, fılmder qaradym. Ózim kolledjdiń úshinshi kýrs stýdentimin. Qazir Muǵaljar aýdanynda tájirıbe jınap júrmin. Aldaǵy ýaqytta bar ómirimdi teatrdy damytýǵa arnamaqpyn»,- dedi Erbolat Amangeldıev.
Teatr festıvali eki kúnge sozyldy. Teatrlar Bákir Tájibaevtyń «Ana júregi» pesasyn, Tahaýı Ahtanovtyń «Kúshik kúıeý» qoıylymyn sahnalady. Kúıshi Qambarǵa, batyr Baıqazaqqa arnalǵan qoıylymdardy Yrǵyz ben Mártók ártisteri kórermenge usyndy.
Qazylar alqasynyń sheshimimen bas júlde Muǵaljar aýdandyq mádenıet úıiniń halyqtyq teatryna berildi.
«Eń úzdik rejısserlyq jumys» nomınatsııasyn Oıyl aýdandyq mádenıet úıiniń rejısseri Erbolat Esenbekov, «Eń úzdik áıel adam beınesi» ataǵyn Alǵa aýdany «Zamanaı» halyqtyq teatrynyń ártisi Danagúl Janádilova, «Eń úzdik er adam beınesi» nomınatsııasyn Yrǵyz aýdandyq «Araı» mádenıet úıi halyqtyq teatrynyń ártisi Daýlen Bolat, «Eń úzdik ekinshi plandaǵy beıne» marapatyn Shalqar aýdandyq halyqtyq teatrynyń ártisi Janulan Saǵyntaev aldy.
