Aqtóbede halyq kóp júretin jerlerde qaıyr sadaqa suraıtyndar kóbeıgen
AQTÓBE. QazAqparat - Aqtóbe qalasynyń halyq kóp shoǵyrlanatyn saýda úıi, demalys oryndary men meshit mańynda qaıyr sadaqa suraıtyndar kóbeıdi. Olardyń arasynda áleýmettik jaǵdaıy tómen otbasy adamdary, múgedekter men ishimdikke salynǵandar da bar. Bir aıdan beri qalada ózge elden kelgen tilemsekter kóbeıip ketken, - dep habarlaıdy QazAqparat tilshisi.
Qaıyr sadaqa surap, kóshede turatyndardyń taǵdyry ártúrli. Biraq bári ómir súrýdiń qymbatshylyǵyn aıtyp, tamaqqa qarjy jetpeıtinin alǵa tartady. Aqtóbe qalasyndaǵy «Nur Ǵasyr» meshitiniń janynda ótken bir kúnimizde Alla úıiniń aýlasyndaǵy birneshe tilemsekti kezdestirdik. Olardyń jasy ártúrli. Biri aty-jónin aıtyp, óz ómirleri týraly baıandaýdan qashsa, ekinshisi aqsha suraýynyń sebebin túsindirip berdi. Meshit janyna eń aldymen Vladımır Azanov keldi. Ol Aqtóbe oblysy Mártók aýdanynda turyp, qalaǵa qonys aýdarǵan. Qarııa múgedek eki nemeresin baǵyp otyr.
«Biz jaldamaly páterde turamyz. Mártók aýdanyndaǵy baspanamyz qulap qaldy. Ony jóndeı almaımyz. Zeınetkermiz, al nemerelerim týa bitti aýrý. Biri talma aýrýyna shaldyqqan, ekinshisi №7 arnaıy mektepte bilim alady. Sóıleı almaıdy, árip tanymaıdy. 7 jyldan beri páter kezeginde turmyz. Qaladaǵy páterge aı saıyn 60-70 myń teńge tóleýge týra keledi»,- dedi 86 jastaǵy Vladımır Azanov.
Baldaqpen júretin qarııa meshit janyna kelgen boıda oǵan «qaıyr sadaqa suraýǵa bolmaıdy» dep aıtyldy. Biraq eshkim bul eskertýge mán bermeıdi.
«Meshit janynda aqsha, kómek surap turǵa bolmaıdy. Ásirese juma kúni qaıyr tilep, kelýshilerdiń aldynan shyǵatyndar kóp. Olarǵa túsindiremiz, ketpese, polıtsııa shaqyramyz. Meshitke keletin adam esh kedergisiz Alla úıine kirýi kerek. Qazirgi kezde ózge elden kelgender de júr. Olar qoldaryna portret ustap alǵan»,- dedi «Nur Ǵasyr» meshitiniń is basqarýshysy Baqytkereı Taýkenov.
Qaıyr sadaqa surap júrgenderdiń biri - Aıgúl. 53 jastaǵy kelinshek Aqtóbe qalasyndaǵy tanysynyń úıinde turyp jatyr. Týberkýlez dertine shaldyqqan ol buǵan deıin aýrýhanada jatqan. Bala-shaǵasy bolǵanymen olardyń áleýmettik jaǵdaıy óte tómen ekenin aıtyp otyr.
«Mamandyq almadym, aýyr jumysqa densaýlyǵym kelmeıdi. Maǵan 9 qabatty úıdiń podezin jınaý, sypyrý jumystary usynalady. Oǵan jaramaımyn. Kóktemde ǵana aýrýhanadan shyqtym. Maǵan qys kıimder kerek. Qazir jaz, jaqsy. Qysta kıer kıim tappaı, dalaǵa shyǵýdan qalamyn»,- dedi Aıgúl.
Ol meshit aldynda birneshe saǵat turyp, adamdardan surap alǵan aqshasyn tek tamaqqa jumsaıtynyn aıtty.
Al ózin Qyzylorda oblysy, Qarmaqshy aýylynyń týmasymyn dep tanystyrǵan 39 jastaǵy Bolatbek Ábdıkerov Aqtóbege jumys isteý úshin kelgenin jetkizdi. Aldynan shyqqan adamǵa «tamaq alyp berińizshi» dep ótinish aıtyp júrgen onyń ishimdik iship, tóbeleskeni anyq baıqalyp tur.
«Jaz aıynda dalaǵa qonamyn, al qysta baspanasy joq adamdardyń úıine baramyn. Maǵan tamaq kerek. Kómek suraý úshin meshit janyna kelip júrmin. Bir qolyma ota jasalǵan edi, qozǵaltý qıyn, jumys isteýge múmkindigim joq. Qazir kottedjder mańyndaǵy aǵashtar arasyna túnep júrmin. Qala ishindegi sýǵa túsip alamyn. Ómirimiz osylaı ótip jatyr. Týǵan-týystarym bar, biraq olarǵa bara almaımyn. Qyzylordaǵa oralǵym kelmeıdi»,- dedi Bolatbek Ábdıkerov.
Eki baldaqpen júrgen Galına ІІІ toptaǵy múgedektigi úshin 25 myń teńge alady. Nemeresin janyna alǵan ol qulap, aıaǵyn syndyryp, on jyldan astam ýaqyt boıy jany qınalyp júr.
«Qala shetinde turamyn. Meshit janyna avtobýspen kelip júrmin. Nemerem taıaýda mektepke barady. Ony kıindirip, qatarynan qaldyrmaý úshin de aqsha kerek. Óz páterim bar, biraq azyq-túlik, kommýnaldyq tólemder qymbat. Ózime dári-dármek alý úshin de aqsha kerek. Osynyń bárine múgedektigime beriletin járdemaqy jetpeıdi. Sondyqtan kelemin, meıirimdi adamdar kómek beredi»,- dedi ol.
Galınanyń aıtýynsha, meshit janyna múgedekter jıi keledi. Polıtsııa qyzmetkerleri kelip, túsindirý jumystaryn júrgizgenimen áleýmettik jaǵynan qorǵalmaǵan top bul mańdy tastap ketpeıdi.
«Bizge polıtsııa kelip, aıtady. Kóbine ózge elden kelgender adamdardyń mazasyn alady. Olardyń balalary da júr. Bári birge kelgen, endi mazamyzdy aldy»,- dedi ol.
Aqtóbelikterdiń «mazasyn» alyp, «tabysqa» ortaqtasqandar «kóz otasyna qarjy qajet» dep jazyp alǵan. Olar ózderin Shymkent týmasymyz dep tanystyrdy. Ózge tilde sóıleıtinder balalaryn janyna jetektep alǵan. Bári de qaıyr sadaqa surap júr.
«Aqtóbede páter jaldap júrmiz. Meniń kózim nashar kóredi. Otaǵa qarjy qajet. 75 myń teńgeniń teń jartysyn jınap qoıdym. Taǵy birneshe kún bolyp, óz óńirimizge oralamyz. Janymda 9 synypqa kóshken qyzym bar. Bir aıdan beri qaıyr sadaqa surap júrmiz»,- dedi Elmıra Mamedova.
Altynaı Saǵyndyqova
