Aqtóbede «Halyq qaýipsizdigin qamtamasyz etý» jobasy qorytyndylandy
Aqtóbe oblysynyń bas prokýrory Marat Qaıybjanovtyń sózinshe, «Halyq qaýipsizdigin qamtamasyz etý» jobasy qorytyndylandy. Bul joly quqyq qorǵaý organdarynyń qyzmetkerleri, jerligikti atqarýshy bılik pen sarapshy, teologtar Aqtóbeniń 8 aýdanynda jumys istedi. Olar 50-den astam aýyldy aralap, 80 myńnan astam adamdy qamtydy. Túsindirý jumystary kezinde arnaıy 9 teolog shaqyryldy. Joba kezinde Aqtóbe oblysy, Hromtaý aýdanyndaǵy meshitti jóndeý úshin 7,5 mıllıon teńge qajet ekeni anyqtaldy. Sonymen qatar, eki meshitte jumys isteıtin ımamnyń jalaqysy kóterilip, aýyldyń eki meshitine ımam taǵaıyndaldy.
Aqtóbe oblystyq prokýratýrasynyń habarlaýynsha, «Halyq qaýipsizdigin qamtamasyz etý» jobasy kezinde aýyl ákimderi tıimdi kásip kózderin úırendi. Sebebi, kez kelgen ákim aldyna kelgen aýyl turǵynyna jańa bıznes jospardy usyna bilýi shart.
«Qarjy ınstıtýttary arqyly 184 mıllıon teńgeden astam qarjy bólindi. Al 113 adam «Bıznes bastaý» kýrsynda bilimin jetildirip, «Bıznes keńesshisi» kýrsyn támamdady. Máselen, Baıǵanın tehnıkalyq kolledjinde aspaz, tiginshi, shashtaraz mamandyqtary boıynsha 2 aılyq kýrs ashylyp, 15 adam oqytyldy. Jobanyń áleýmettik qoldaý baǵyty boıynsha 200-den astam adam jumysqa ornalasyp, balalarǵa járdemaqy taǵaıyndaldy. Bilikti dárigerler 600-den astam adamǵa em júrgizdi. Oqýshylar saýyqtyrý ortalyǵyna joldama alyp, em-domdy qajet etetin aýyl adamdar Aqtóbedegi aýrýhanalarǵa jiberildi. Múgedekterge kómekshi berilip, «Jaqynyńa kómektes» qaıyrymdylyq aktsııasy kezinde 180 aýyl turǵyny men az qamtylǵan otbasyǵa materıaldyq kómek berildi»,- dedi Aqtóbe oblysy prokýratýrasynyń baspasóz qyzmeti.
Jumys toptarynyń quramyna kirgen teologtar men sarapshylar destrýktıvti dinı aǵym jeteginde júrgendermen, sonyń ishinde túzetý mekemelerindegi sottalǵandarmen 60 kezdesý ótkizdi. «Nátıjesinde 21 adam dástúrli ıslamdy qabyldady, taǵy 52-si raıynan qaıtýǵa beıim»,- dedi Aqtóbe oblystyq din isteri basqarmasynyń basshysy Joldas Qalmaǵanbetov.
Aqtóbe oblysynyń ákimi Berdibek Saparbaev pen oblys prokýrory Marat Qaıybjanov «Halyq qaýipsizdigin qamtamasyz etý» jobasyn iske asyrǵan jumys tobyn marapattady.
«Kóp jumys atqaryldy. Qol jetkizilgen jetistikterge toqtalmaı, halyqtyń ózekti áleýmettik máselelerin júıeli túrde sheshýdi jalǵastyrý mańyzdy»,- dedi óńir basshysy B. Saparbaev.
Aıta keteıik, jobany iske asyrý kezinde terrorızm turǵysynan osal nysandar tekserildi. «Qarý» jedel aldyn alý sharasy kezinde - 26, «Mıgrant» sharasy kezinde 40 adam ákimshilik jaýapkershilikke tartyldy. Zańsyz páter jaldaǵandar, telefon satyp, taksı qyzmetin usynǵandar kásibin tirkedi.