Aqtóbede halyq qarjysyna salynǵan «Analarǵa taǵzym» tárbıe berý ortalyǵy ashyldy
AQTÓBE. QazAqparat - Aqtóbe qalasynda halyq qarjysyna «Analarǵa taǵzym» ortalyǵy salyndy. Ortalyqty salýǵa 10 myńnan astam adam 350 mıllıon teńge jınap berdi, dep habarlaıdy QazAqparat tilshisi.
Aqtóbe qalasyndaǵy Batys-2 aýdanynda jańa ortalyq ashyldy. Munda elimizdiń ataqty tulǵalarynyń analaryna qatysty barlyq aqparattar jazylyp, portretteri ilindi. Ortalyqta 3 zal bar. Alǵashqysyna «Ana dańqy» ataýy berilip, Mánshúk Mámetova, Baýyrjan Momyshuly, Ábish Kekilbaev, Muqaǵalı Maqataev, Ábilhan Qasteevtiń analarynyń portretteri ilindi. Sonymen qatar, Gennadıı Golovkın, Dmıtrıı Balandınniń analary týraly aqparat bar. Bul zaldaǵy málimetter tolyqtyrylady. 
«Barlyǵymyz anamyzdyń aldynba bas ıemiz, ómir boıy anamyzdy qurmettep ótemiz. Jańa ǵımarat aqtóbelikterdiń analar aldyndaǵy boryshyn óteýdiń bir úlgisi dep dep esepteımiz. Maqsatymyz - Qazaqstandaǵy analarǵa bas ıip, óskeleń urpaq úshin úlgili bolar ortalyq jasaý. Munda qazaqtyń, Qazaqstannyń atyn shyǵarǵan analardy nasıhattap, qyz-kelinshekterge ulttyq tárbıe berý jumysy atqarylady. Elbasy Nursultan Nazarbaevtyń «Rýhanı jańǵyrý» baǵdarlamasyna oraı ulttyq qundylyqtardy nasıhattaǵymyz keledi»,- dedi oblys ákimi Berdibek Saparbaev. 
Aıta keteıik, ortalyq ishinde qolóner, bı úıirmesi men aspazdyq sheberlikti úıretetin bólme jumys isteıdi. Qonaq kútý, ulttyq salt-dástúrdiń ereksheligi keń tanystyrylady.
Aıta keteıik, ortalyqta mýltımedııalyq ekspozıtsııa zaly bar. Onda Bopaı hanym, Álııa Moldaǵulova, Nursulý Tapalova, Roza Jamanova sekildi birtýar qazaq qyzdarynyń ómirbaıany men erlikteri LED ekran arqyly kórsetiledi. Sonymen qatar, ortalyqta Nursulý Tapalova atyndaǵy arnaıy horeografııa zaly qarastyrylǵan. Munda balet klasy jumys isteıdi.
