Aqtóbede halyqaralyq «Ádebıet. Rýh. Qoǵam» ádebı baıqaýynyń jeńimpazdary marapattaldy

AQTÓBE. KAZINFORM — Aqtóbe oblysynda halyqaralyq «Ádebıet. Rýh. Qoǵam» ádebı baıqaýynyń saltanatty marapattaý rásimi ótti. Bul týraly Mádenıet jáne aqparat mınıstrliginiń baspasóz qyzmeti habarlady. 

Іs-sharaǵa memleket jáne qoǵam qaıratkerleri, Qazaqstan Jazýshylar odaǵynyń basqarma tóraǵasy Mereke Qulkenov bastaǵan belgili aqyn-jazýshylar men mádenıet maıtalmandary qatysty.

Baıqaý alǵash ret 2019 jyly forým retinde bastaý alyp, ýaqyt óte halyqaralyq deńgeıdegi bedeldi ádebı jobaǵa aınaldy. Jyl saıynǵy dástúrli doda aıasynda qazaq ádebıetiniń poezııa, proza, dramatýrgııa, satıra, balalar ádebıeti jáne aýdarma janrlaryndaǵy úzdik týyndylar anyqtalady.

Ádebı baıqaýdyń negizgi maqsaty – qalamgerlerdiń esimderin ulyqtaý jáne olardyń jolyn jalǵap kele jatqan búgingi býynnyń shyǵarmashylyǵyn qoldaý.

Bıylǵy baıqaý qazaq poezııasynyń kórnekti ókili Qýandyq Shańǵytbaevtyń 100 jáne satırık-jazýshy, ustaz Úmbetbaı Ýaıdınniń 90 jyldyǵyna arnaldy. Dodaǵa elimizdiń túkpir-túkpirinen jáne shetelderden barlyǵy 140-tan astam shyǵarma qabyldandy. Baıqaý nátıjesinde ádebıetiniń kórnekti ókilderi atyndaǵy 11 nomınatsııa boıynsha úzdik qalamgerler marapattaldy.

Saǵı Jıenbaev atyndaǵy nomınatsııany Indıra Kereeva, Tólegen Aıbergenov atyndaǵy nomınatsııany Amanjol Islamǵalı jeńip alsa, Tahaýı Ahtanov atyndaǵy nomınatsııany Gúljaınar Qaldına, Úmbetbaı Ýaıdın atyndaǵy nomınatsııany Nurlybek Qalaýov, Іztaı Mámbetov atyndaǵy marapatty Ernur Seıdahmet ıelendi. Túrkııa eliniń jas aqyny Fatıh Sýltan Iylmaz Qýandyq Shańǵytbaev atyndaǵy nomınatsııanyń jeńimpazy atandy.

Eske sala keteıik, buǵan deıin Almatyda jazýshy, kúıshi Talasbek Ásemqulov atyndaǵy kúıshiler men qalamgerler baıqaýy ótkenin jazǵan edik.