Aqtóbede gvardııashylar ózin nashar sezingen áıelge alǵashqy kómek kórsetti
AQTÓBE. KAZINFORM - Aqtóbe qalasyndaǵy 66/55 áskerı bóliminiń qyzmetshileri kóshede esinen tanyp qalǵan áıelge alǵashqy kómek kórsetti.
Ulttyq ulannyń 66/55 áskerı bólim qyzmetshileri qoǵamdyq tártipti qamtamasyz etý kezinde kóshede qulap qalǵan áıeldi qutqaryp qaldy. Patrýldik toptyń bastyǵy qatardaǵy jaýynger Meırambek Ismaǵululy men patrýlshiler Temirlan Qosaev pen Shahbos Mırıýnýsov dereý jedel járdem shaqyrǵan.
- Biz jedel járdem shaqyrdyq jáne dárigerler kelgenge deıin alǵashqy medıtsınalyq kómek kórsetýge kiristik. Kómek kórsetken kezde áıel óz-ózine keldi, - dedi qatardaǵy jaýynger Meırambek Ismaǵulov.
Ulttyq ulannyń baspasóz qyzmetiniń habarlaýynsha, dárigerler naýqastyń qan qysymyn ólshep, sodan keıin Aqtóbe qalasynyń aýrýhanasyna jetkizdi.
