Aqtóbede ǵun dáýirinde jerlengen «altyn adam» tabyldy

Aqtóbe qalasy mańyndaǵy Qýraıly aýylynda karerden baǵaly jádiger tabyldy. Qum qazyp júrgen jumysshylar kenet adamnyń basy domalap túskenin, keıin altyn tústi buıymdar tógilgenin aıtady.

«Karerde qazba jumystary júrgizilip jatqan kezde tıegishten adam súıegi qulap tústi. Sol kezde tıegishtegi qumdy tógip tastadyq. Adamnyń bas súıegi tabylyp, keıin áshekeı buıymdardyń bólshekteri tógildi. Biz dereý jumysty toqtatyp, ákimdikke habar berdik. Olar kelip, arheologtar qazba jumystaryn júrgizdi», - dedi karer ıesi Danat Baqyt.

Aqtóbe oblystyq tarıhı-ólketaný mýzeıiniń dırektory Meıram Nurlanulynyń aıtýynsha, ǵun dáýiriniń jaýyngeri jerlengen jer 3 maýsym kúni tabylyp, jan-jaǵy túgel qorshaýǵa alynǵan.
 

«Aqtóbekrıstallsý» kompanııasyna tıesili jerde qum alý jumystary júrgizilip jatqan. Sol kezde ejegi qabir tabylyp, jedel habar tústi. Jergilikti polıtsııa bólimi men ákimshilik ókilderi kelip, oblystyq mýzeı qyzmetkerlerin shaqyrdy. Arheologtar qazba jumystaryn júrgizgen soń bizdiń zamanymyzǵa deıingi ІІ-ІV ǵasyrlarǵa jatatyn zırat ekenin anyqtady. Ol jerge bedeldi adamnyń jerlengenin aıtýǵa bolady. Adamnyń súıegi jatqan jerde baǵaly metaldan jasalǵan buıymdar bar. Attyń erin sary tústi metaldan áshekeılegen. Bas kıimi nemese kıimi de sary tústi metalmen kómkerilgen. Qazir bárin jınap alyp, mýzeıdiń qoryna saqtap otyrmyz. Tirkeý júrgizilip, qalpyna keltirý bastalady», - dedi mýzeı dırektory Meıram Nurlanuly.
 

Bul Aqtóbe óńiri úshin qundy jádiger. Sebebi, buǵan deıin ǵun dáýiriniń qundy jádigerleri múlde tabylmaǵan.

«Ókinishtisi - jer qazý kezinde onyń bastapqy qalpy buzyldy. Endi tolyq qaltyna keltirý qıynǵa soǵady. Metaldyń syrt keıpi sary, altynǵa uqsaıdy. Salmaǵyn da aıta almaımyz. Almatydaǵy synama jasaý laboratorııasyna jiberemiz, bári sol kezde belgili bolady. Al ǵun dáýiri dep ataýymyzǵa polıhromdyq stıl sebep boldy. ıAǵnı, metall men baǵaly tastardy japsyryp, ınkrýstatsııa jasaǵan eken. Sonymen qatar, attyń eriniń eń alǵash jasalyp, paıdalanylǵan kezeńi ǵun dáýiri bolyp sanalady. Eskertkishtiń baıqalmaýynyń bir sebebi bar. Sol kezeńde beıitti tonap ketpes úshin jasyryn jerlegen», - dedi Meıram Dúısenǵalı.
 

Bul aýmaqtan tek jaýyngerdiń, onyń aty men ábzelderi, áshekeıi ǵana tabyldy. Arheologtar aýmaqty túgel qarap shyqqanymen, ózge eshteńe kózge ilikpedi.

«Teriden jasalǵan belbeýdiń kúmis tústes basy, súıekten jasalǵan qylyshtyń bir bólshegi, baǵaly tastar, qoladan jasalǵan at ábzelderi men sary metall tústes áshekeıler bar», - dedi Meıram Dúısenǵalı.

Tabylǵan qundy jádiger aldaǵy ýaqytta jańa mýzeıdiń altyn nemese baǵaly metaldar zalyna qoıylady.