Aqtóbede grek-rım kúresinen Qazaqstan chempıonaty bastaldy
AQTÓBE. QazAqparat – Aqtóbe qalasynda grek-rım kúresinen el birinshiligi bastaldy. Úsh kúnge josparlanǵan chempıonatqa Nur-Sultan, Almaty, Shymkent qalalary jáne 14 oblystan 200-den astam boz kilem sheberi qatysýda, dep habarlaıdy QazAqparat tilshisi.
Jekpe-jek saraıynda 10 salmaq boıynsha palýandar ózara myqtyny anyqtaıdy. Jeńimpazdar ulttyq quramaǵa alynady jáne álem, Azııa chempıonatyna qatysýǵa múmkindik alady.
«Sportshylardyń arasynda álemdik boz kilemde kúresip júrgen palýandar baryn eskersek, bıylǵy el birinshiligi tartysty ótpek. Pandemııaǵa baılanysty sanıtarlyq talapqa saı jarys kórermendersiz ótip jatyr. Alaıda chempıonatty YouTube kanalynan, @aqtobe_obl_sport áleýmettik jelide tikeleı efırde tamashalaı alady. Atalmysh doda QR Táýelsizdiginiń 30 jyldyǵy men Qajymuqan Muńaıtpasulynyń 150 jyldyǵyna oraılastyrylǵan», - dedi oblystyq dene shynyqtyrý jáne sport basqarmasy baspasóz qyzmetiniń jetekshisi Erlan Muqan.
Aıta keteıik, Aqtóbe oblysynyń quramasy úzdikterden jasaqtalǵan. Qurama sapynda 60 kelige deıingi salmaqta V jazǵy spartakıadanyń júldegeri Nurbolat Temirbaev, 63 kelide Kadetter arasynda Azııa chempıonattarynyń jeńimpazdary Ádil Sısenbaev, 77 kelige deıingi salmaqta Azııa chempıony Dáýlet Jalǵasov bar. Úzdik úshtikke engen aqtóbelik sportshylar jyl boıy jergilikti bıýdjetten qomaqty shákirtaqy ala alady. Naýryz aıynyń basynda Italııa astanasynda Qazaqstan ulttyq quramasynyń qatysýymen halyqaralyq reıtıngtik týrnır ótedi. Onda 63 kelige deıingi salmaqta jergilikti grek-rımdikterdiń tanymal kóshbasshysy, eńbek sińirgen sport sheberi Meırambek Aınaǵulov óner kórsetedi.
