Aqtóbede grek-rım kúresinen el birinshiligi aıaqtaldy
AQTÓBE. QazAqparat – Aqtóbede grek-rım kúresinen el birinshiligi aıaqtaldy. Jarysta Almaty oblysynyń quramasy birinshi oryndy jeńip aldy, dep habarlaıdy QazAqparat tilshisi.
Aqtóbe qalasynda grek-rım kúresinen el birinshiligi aıaqtaldy. Úsh kúnge josparlanǵan chempıonatqa Nur-Sultan, Almaty, Shymkent qalalary jáne 14 oblystan 200-den astam bozkilem sheberi qatysty.
«Kúrestiń aıla-táseliniń joǵary bolǵanyn qalaımyz. Sondyqtan elimizdiń ár túkpirinen kelgen aǵa jattyqtyrýshylardy jınap, taǵy bir keńes ótkizemiz. Negizi, byltyrǵymen salystyrǵanda bıyl kórsetkish joǵary. Áli de palýandardy shırata túsý kerek. 77 keli salmaq dárejesinde kúresken aqtóbelik Dáýlet Jalǵasovty erekshe atap ketkim keledi. Palýan óz babynda. Jalpy, Aqtóbe bes medal aldy. Árqaısysy ulttyq quramaǵa kiredi dep oılaımyn. Ádil Sısenbaevtyń da kórsetkishi joǵary. Bul jattyqtyrýshylardyń jetisti, eńbegi», - dedi QR Eńbek sińirgen jattyqtyrýshysy Jańabaı Ospanov.
Palýandar 10 salmaq boıynsha kúresti. Jalpy komandalyq esepte Almaty oblysy 1-oryn, Aqtóbe oblysy 2-oryn, ShQO 3-oryn aldy.
«Almaty oblysynan kóp palýan qatysty. Olardyń salmaǵy basym. Deńgeıi joǵary. Aqtóbelik palýandardyń daıyndyǵy myqty. Tek kórermen bolmady, sportshylar demeýdi sezinbedi. Ózimizdiń qateligimizdi eskerip, jumys isteýdi jalǵastyramyz Úsh altyn alamyz degen josparymyz bolǵan edi», - dedi Aqtóbe oblysynyń aǵa jattyqtyrýshysy Amanǵazy Іzbaı.
