Aqtóbede grantqa túsirý úshin talapkerlerdiń balyn ádeıi joǵarylatqan

AQTÓBE. QazAqparat - Aqtóbe oblysynda grantqa túsý balyn ádeıi joǵarylatý faktileri anyqtaldy, dep habarlaıdy QazAqparat tilshisi Memlekettik qyzmet isteri jáne sybaılas jemqorlyqqa qarsy is-qımyl agenttiginiń departamentine silteme jasap.

«Tamyz aıynda kolledjder men JOO-daǵy memlekettik grant bólinisine monıtorıng júrgizdik. Bıyl jergilikti bıýdjet qarajaty esebinen kolledjderde 4 myń tegin oqý orny bólingen. Tekseris kezinde keıbir kolledj dırektorlary jekelegen talapkerlerge memlekettik grantty berý úshin balyn ádeıi joǵarylatqanyn anyqtadyq. Tekseris áli júrip jatyr, biz shara qarastyramyz. Árbir kolledjde osyndaı 3-4 derek anyqtalyp jatyr», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblystyq departamenti basshysynyń orynbasary Rafhat Bısenov.

Onyń aıtýynsha, qamqorshylyq keńestiń qurylǵanyna qaramastan, mektepterde áli kúnge aqsha jınaý deregi joıylmaı tur. Jýyrda ǵana №5 mektepte ata-analardan aqsha jınalǵany týraly aqparat áleýmettik jelige taraǵan bolatyn.

«Biz aqsha jınaý deregine shara qoldanamyz. 11-synyp oqýshylarynan UBT-ǵa daıyndaý úshin 300-500 teńgeden aqsha jınaý faktileri bar. Bul zańǵa qaıshy, biz mundaı áreketterdi zańsyz dep taný týraly usynystar engizip jatyrmyz», - deıdi R. Bısenov.