Aqtóbede gonkong tumaýyn juqtyrǵandardyń kóbi — balalar
AQTÓBE. KAZINFORM — Aqtóbede 97 adam gonkong tumaýyn juqtyrǵan. Onyń ekeýi júkti áıel, 72-ici jasy 14-ke tolmaǵan bala.
Aqtóbe oblysynda JRVI juqtyrǵan 100-den astam adam aýrýhanada em qabyldap jatyr. Onyń 75-i balalar. Bul málimetti oblystyq densaýlyq saqtaý basqarmasynyń baspasóz qyzmeti taratty.
Al Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanovanyń aıtýynsha, A tıpti tumaý (H3N2 shtamm — red.) 97 adamnan anyqtaldy. Onyń 72-isi 14 jasqa deıingi balalar arasynda bolsa, ekeýi júkti áıelden anyqtalyp otyr.
Oblys boıynsha aýrýhanadaǵy tósek orynnyń 60 paıyzynda naýqastar em qabyldap jatyr.
— Bilim berý uıymdarynda maýsymdyq JRVI men tumaýdyń aldyn alý úshin birqatar shara kózdelgen. Aýrý belgilerin erte anyqtaý úshin tańerteńgi súzgini uıymdastyrý, eger bala nemese qyzmetkerden qandaı da bir belgi tirkese olardy ýaqytsha shettetý, ǵımarattyń ár qabatynda jáne synyptarda qol jýýǵa, zalalsyzdandyrýǵa arnalǵan antıseptık quraldaryn qoıý sııaqty jalpy profılaktıkalyq sanıtarııalyq talaptar saqtalýy kerek. Bul sharalar oqý oryndarynda ınfektsııalyq aýrýdyń taralý qaýpin tómendetýge baǵyttalǵan jáne jyl saıyn maýsymdyq kezeńde qoldanylatyn qalypty tájirıbe. Aqtóbedegi jalpy bilim beretin mektepterde maska rejımi engizilgen joq. Qosymsha shekteý sharalary engizilmedi. Bilim berý uıymdary offlaın rejımde jumys istep jatyr. Epıdemıologııalyq jaǵdaı turaqty, — dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanova.
Epıdemıolog mamandardyń aıtýynsha, A (H3N2) maýsymdyq tumaýdyń quramyna kiretin vırýstyń túri. Tek balalar, qart kisiler men júkti áıelder, sozylmaly aýrýy bar adamdar úshin qaýipti.
— Tumaýdyń aldyn alý sharasy — maýsym aldyndaǵy vaktsınatsııa. Oblys boıynsha barlyǵy 130 myńnan astam adam tumaýǵa qarsy ekpe aldy. Bul jalpy halyq sanynyń 14% quraıdy. Onyń ishinde 108 567 adam jergilikti bıýdjet esebinen egildi, — dedi Aqtóbe oblystyq sanıtarııalyq-epıdemıologııalyq baqylaý departamentiniń basshysynyń orynbasary Indıra Aıaǵanova.
Aıta keteıik, Batys Qazaqstanda 75 adam gonkong tumaýyna shaldyqqan. Sonyń 55-i — balalar.