Aqtóbede Gınnestiń rekordyn jańartý úshin 4 myńnan astam adam qan qysymyn ólshetti
AQTÓBE. QazAqparat - Aqtóbe qalasynyń Densaýlyq saıabaǵynda Gınnestiń rekordyn jańartý úshin 4 myńnan astam adam qan qysymyn ólshetti. Barlyǵy 500 medıtsına qyzmetkeri aldyn ala daıyndalyp, adamdardy qabyldady, dep habarlaıdy QazAqparat tilshisi.
Buǵan deıin habarlaǵanymyzdaı, keshkilik aqtóbelikter Densaýlyq saıabaǵyna jınaldy. Munda bir mezette 500 medıtsına qyzmetkeri turǵyndardyń qan qysymyn ólshep berdi. Gınnestiń rekordyn jańartý úshin oblystyq densaýlyq saqtaý basqarmasy osy jyldyń aqpan aıynda arnaıy ótinish jazǵan. Al rekordty jańartý aktsııasyna tek qala turǵyndary ǵana emes, aýdandaǵy medıtsına qyzmetkerleri de qatysty.
«Rekord jańartý óte sırek bolady. Sondyqtan usynys túsken kezde qýana qabyldap, aktsııaǵa qatystyq. Bizge qoıylǵan talap boıynsha aktsııa kezinde ár medıtsına qyzmetkeri 10 adamnyń qan qysymyn ólsheıdi. Bir adamǵa 3-4 mınýt ýaqyt berilgen. Negizi biz adamnyń aty-jónin, jeke kýáliktegi nómiri men baılanys telefonyn jazyp alamyz. Keıin qatysýshyǵa arnaıy nómer taǵamyz. Eger qan qysymy joǵary bolsa, dárigerlerdiń baqylaýyna jiberiledi. Qolymyzda aqparattyq arnaıy jadynama da bar», - dedi Alǵa aýdandyq aýrýhanasynyń qyzmetkeri Ǵalııa Muqtarqyzy.
Aqtóbelikter keshki saǵat 19:00-de bastalǵan aktsııaǵa eki saǵat buryn jınaldy. Olar aldymen jeke kýáligin berip, tirkeýden ótti. Tirkelgen soń ózderi qalaǵan medıtsına qyzmetkeriniń janyna baryp, qan qysymyn ólshetti. Aktsııaǵa qatysýshylar arasyndaǵy dárigerge turaqty qaralyp júrgen adamdar men aq halattylarǵa óte sırek qaralatyn adamdar bar.
«Biz tarıhta qalý úshin búgingi aktsııany qýana qabyldadyq. Ózim qan qysymymdy jıi ólshetpeımin, dárigerdiń aldyna kóp barmaımyn. Búgin tekserilip, bári qalypty ekenin bildim», - dedi qala turǵyny Tamara Jumatova.
Aqtóbe oblystyq densaýlyq saqtaý basqarmasynyń basshysy Áset Qalıevtiń aıtýynsha, búgin 4 myńnan astam adamnyń qan qysymy ólshendi. Talap boıynsha 80 baqylaýshy qarady. Bári beınekameraǵa túsirilip, aldaǵy ýaqytta jınalǵan materıal Londondaǵy Gınnestiń rekordtar kitaby keńsesine jiberiledi. Jaýap eki aptadan soń belgili bolmaq.
«Aqtóbede mundaı aýqymdy shara birinshi ret ótkizilip jatyr. Bári jaqsy uıymdastyrylyp, ýaqytqa saı atqarylatyn jumys rettelgen. Halyq óte kóp jınalyp, úles qosty. Mindetti túrde Gınnestiń rekordyn jańartamyz dep oılaımyn», - dedi halyqaralyq dárejedegi tóreshi Borıs Romanov.
