Aqtóbede Gıdrotehnıkalyq qurylystarǵa qyzmet kórsetý mekemesi qurylady
AQTÓBE. KAZINFORM – Aqtóbe oblysynda Gıdrotehnıkalyq qurylystarǵa qyzmet kórsetý mekemesi qurylyp, ony jaraqtandyrýǵa 93 mln teńge bólindi. Sonymen birge bıyl jazdyń aptap ystyǵynda órtten saqtanýǵa basa nazar aýdaryldy.
Aqtóbe oblystyq máslıhatyndaǵy kezekti sessııada bıýdjet shyǵysy taǵy naqtylandy. Bul joly 27,8 mlrd teńgeniń qalaı jumsalatyny belgili boldy.
— Memleket basshysynyń tapsyrmasyna sáıkes sý tasqyny saldarynan qalyptasqan kúrdeli jaǵdaıǵa baılanysty ımıdj jáne de basqa da jaǵdaılardy azaıtý, qurylysy toqtap, sot protsesi nemese túzetý jumysy júrip jatqan jobalar boıynsha shyǵyndardy qysqartý júrgizildi. Sonymen qatar júrgizilgen taldaýǵa sáıkes jyl ishinde bolatyn únemdeý qarajatynyń esebi nazarǵa alyndy. Birinshi kezekte tótenshe jaǵdaılardyń saldaryn joıý, onyń ishinde oblystyq jáne aýdandyq mańyzy bar avtomobıl joldaryn, áleýmettik nysandardy qalpyna keltirý úshin rezerv kólemin ulǵaıtý úshin Aqtóbe oblystyq Qarjy basqarmasyna 10 mlrd teńge bólý josparda. Sonymen qatar Qazgıdromet boljamyna sáıkes bıyl jaz aılary ádettegiden ystyq bolady dep kútilýde. Osyǵan baılanysty dalalyq órtke qarsy is-sharalar úshin órtke qarsy tehnıka men jabdyqtardy satyp alý josparda. Atap aıtsaq oblystyq TJD órtke qarsy qyzmet bólimshelerin jaraqtandyrýǵa 448 mln teńge, oblystyq Tabıǵı resýrstar jáne tabıǵatty paıdalanýdy retteý basqarmasyna orman sharýashylyqtarynyń materıaldyq-tehnıkalyq bazasyn nyǵaıtýǵa 382 mln teńge qarastyryldy. Jańadan qurylǵan Gıdrotehnıkalyq qurylystarǵa qyzmet kórsetý mekemesi jaraqtandyrýǵa 93 mln teńge bólindi, - dedi oblystyq Ekonomıka jáne bıýdjettik josparlaý basqarmasynyń basshysy Nurjan Maqsatov.
Sonymen birge órt sóndirý avtomobılderin satyp alýǵa 423 mln teńge, órtke qarsy erikti qurylymdaryn jaraqtandyrýǵa 313 mln teńge josparlandy.
— Sý tasqyny saldarynan zardap shekken otbasy balalaryn kıim-keshek, mektepke kerek jabdyqtarmen qamtýǵa 85 mln teńge bólý josparda. Sonymen birge Yrǵyz aýdany boıynsha tótenshe jaǵdaılar saldarynan ómirlik qıyn jaǵdaıǵa tap bolǵan otbasylarǵa 100 AEK kóleminde jalpy somasy 95 mln teńge áleýmettik kómek kórsetý josparlanyp otyr, - dedi Nurjan Maqsatov.
Aıta keteıik, qazirgi kezde tek Yrǵyz aýdanynyń Quılys jáne Jaısańbaı aýyldarynda sý tasqynyna qarsy kúres jumysy áli jalǵasyp jatyr. Jalpy Yrǵyz aýdanyndaǵy qurylys jumystaryna 13 merdiger mekeme jumyldyrylady.
