Aqtóbede «GAZelmen» soqtyǵysqan avtobýs aýdarylyp qaldy
AQTÓBE. QazAqparat - Aqtóbe qalasynda Baýyrlastar aýylyna qatynaıtyn avtobýs aýdarylyp qaldy. Eki jolaýshy aýrýhanaǵa tústi, dep habarlaıdy QazAqparat tilshisi.
Aqtóbede jolaýshylarǵa jedel kómek qajet boldy. Qala mańyndaǵy aýylǵa qatynaıtyn qoǵamdyq kólik «GAZelmen» soqtyǵysyp, saldarynan avtobýs aýdarylyp qaldy.
«Oqıǵa ornyna jedel járdem shaqyrylyp, eki naýqasqa kómek kórsetildi. Zardap shekken adamdar jedel járdem aýrýhanasyna jetkizildi», - dep habarlaıdy oblystyq Densaýlyq saqtaý basqarmasynyń baspasóz qyzmeti.
Aqtóbe oblystyq polıtsııa qyzmeti qazir tekserý júrip jatqanyn málimdedi.
«Avtobýs ishinde júrgizýshi, kondýktor jáne tórt jolaýshy boldy. Eki jolaýshy dene jaraqatymen aýrýhanaǵa tústi. Bastapqy málimet boıynsha, «GAZel» kóligi avtobýsqa soqtyǵysyp, qoǵamdyq kólik aýdarylǵan», - dedi oblystyq PD baspasóz qyzmetiniń jetekshisi Erbolat Sarqulov.
