Aqtóbede gaz qysymy tómendep, saıajaıdaǵy úılerdi jylytý qıyndady

AQTÓBE. QazAqparat – Aqtóbe qalasynda gaz qysymy tómendep, turǵyn úılerge jylý berýde problema týyndady. Qazirgi kezde arnaıy komıssııa qurylyp, tekserý bastaldy, dep habarlaıdy QazAqparat tilshisi.

Aqtóbe qalasy mańyndaǵy saıajaı ujymdarynda gaz qysymyna qatysty másele týyndady. Qazirgi kezde turǵyndar shaǵym jazyp, kómek surap jatyr. Búgin qala ákimdigi, oblystyq Turǵyn úı-kommýnaldyq sharýashylyǵy basqarmasy, gaz salasyna jaýapty mamandar birigip, úı-úıdi aralap júr. Onda birneshe úıdegi gaz qysymynyń qys aılarynda tómendep ketetini anyqtaldy.

«Gazdy jaqqanymyzben, qysymy tómen. Aıazdy kúnderi osyndaı kúıge túsemiz. Byltyr da aıazdy kúni nasharlap ketti. Shaı qaınatý, tamaq pisirý qıyn. Batareıa jylýy álsiz», - dedi turǵyn Symbat Berǵazına.

Qazirgi kezde bul úılerde gaz qysymy 80 gradýsty kórsetip tur. Talap boıynsha 140 gradýs bolýy tıis.

«Eki mekenjaı boıynsha tekserý jumysy júrgizildi. Shaǵymdardyń barlyǵyn qabyldap, mán-jaıdy anyqtap jatyrmyz. Kóbi gaz qysymy nashar ekenin aıtýda. Keıbirinde túıitkil basqada bolyp otyr. Negizi gaz janyp tur. Al terezeleri, úı qabyrǵalary durys qaptalmaǵan. Keıbirinde shynymen de, qysym tómen. Sondyqtan ár aryz, ótinish jeke qaralady», - dedi «QazTransGaz Aımaq» AQ Aqtóbe oblystyq fılıaly apattyq dıspetcherlik qyzmet basshysy Jomart Bitirbaev.

Aıta keteıik, turǵyndardyń kóbi saıajaıdaǵy úıine gazdy jeke kompanııalardyń kómegimen tartyp, qosyp alǵan. Keıbiri qazir ıelerin taba almaı júr.

«Aqtóberentgen» saıajaı ujymynda turǵanyma 10 jyl boldy. Sońǵy jyldary qysta gaz qysymy tómendep ketip júr. Byltyr oblystyq gaz mekemesine bardyq. Olar eshteńe qoldan kelmeıtinin, jeke kompanııa jaýapty ekenin aıtty. Tamaq pisip bolmaıdy, shaı qaınatý da qıyn», - dedi qala turǵyny Alǵabek Berǵazın.

«QazTransGazAımaq» kompanııasynyń ókilderi qazirgi kezde tekserý jumysyn jalǵastyryp jatyr.

«Jeke kásipkerler qubyr tartý jumystaryn júrgizgen. Endi biz ony tappaı jatyrmyz. Sondyqtan kompanııa keıbir jerde qaıta montajdaý jumysyn júrgizip, retke keltirýdi qolǵa aldy. Máselen bir adam úıine gaz tartady, odan taǵy bireýi ózine jalǵap, qosady. Al qubyr dıametri birneshe úıdi qatar qamtýǵa jetpeıdi. Demek, dıametri kishkentaı. Qalada 300-ge jýyq saıajaı ujymy bar. Onyń 50-inde osyndaı másele týyndaǵan», - dedi «QazTransGaz aımaq» AQ AOF tehnıkalyq ınspektsııa basshysy Ernar Mýkanov.