Aqtóbede gaz quıý stansasy órtendi
Oqıǵa 17 shilde túngi saǵat 00.07-de tirkeldi.
112 qutqarý qyzmetine Qobda aýdany Samara-Shymkent tasjolynyń 616 shaqyrymyndaǵy «Etalon gaz» gaz quıý stansasynyń jerasty rezervýary jáne gaz tasyǵan kóliktiń artqy jaǵynan gaz janǵany týraly habar tústi.
Jalyndy sóndirýge 20-dan astam órt sóndirýshi men 5 tehnıka dereý jumyldyrylǵan.
«Sonymen qatar oqıǵa ornyna TJD basshylyǵy baryp, jaǵdaıdy baqylap, órttiń der kezinde sóndirilýin qadaǵalady. Órt sóndirýshilerdiń kásibı jáne úılesimdi jumysynyń arqasynda órt basqa obektilerge taramady. 20 tonnalyq kólik pen qasynda turǵan gazel qaýipsiz jerge áketken soń búlinbedi. Órt saǵat 01:50-de oqshaýlanyp, 02:15-te sóndirildi. Zardap shekkkender joq. Qazirgi kezde órttiń shyǵý sebebi anyqtalyp jatyr. Aqtóbe oblysy TJD órt qaýipsizdik talaptaryn qatań baqylaýdy eskertedi»,- dep habarlady oblystyq TJD baspasóz qyzmeti.
Eske salsaq, Aqtóbe oblysy Alǵa qalasynda qurǵaq shóp janyp, saıajaı aýmaǵyna tarap ketti. Barlyǵy 10 úı órtendi.
Bul úılerde adam turmaıdy, tek baý-baqsha daqyldary egiledi. Zardap shekkender joq.
Órt sóndirýge tótenshe jaǵdaılar departamentinen 26 adam jáne 5 tehnıka jiberildi. Al jergilikti atqarýshy organdardan 10 adam men 3 tehnıka jumyldyryldy.
