Aqtóbede gaz quıý beketindegi órtten aman qalǵan er adamǵa kúrdeli ota jasalady
AQTÓBE. KAZINFORM — Órt kezinde ol eki balasy men áıelinen aıyryldy. Ózi bir aıdan beri aýrýhanada em qabyldap jatyr.
Naýqas qazir № 1 Aqtóbe qalalyq kópsalaly aýrýhanasynda em qabyldap jatyr. Kólik órtengen sátte 54 jastaǵy er adamnyń denesiniń teń jartysyna jýyǵyn kúıik shalǵan.
— Qazirgi ýaqytta naýqastyń jaǵdaıy turaqty, gemodınamıkalyq kórsetkishteri qalypty. Patsıent beıindi bólimshede qajetti em qabyldap jatyr. Bet jáne aıaq-qoldardaǵy kúıik jaralary jazylyp keledi. Emdeý josparyna sáıkes, aldaǵy ýaqytta keýde qýysynyń kúıik jaralaryna aýtodermoplastıka jasaý josparlanǵan, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Eske salaıyq, 19 maýsym kúni gaz quıý beketinde turǵan kólik órtenip, úsh adam janyp ketti. Kólik ishindegi úsh adamnyń ekeýi kámelet jasqa tolmaǵan.
Osy oqıǵadan soń gaz quıý beketiniń ıesi qamaldy. Qylmystyq kodekstiń «Jarylys qaýpi bar obektilerde qaýipsizdik qaǵıdalaryn buzý» baby boıynsha is qozǵaldy.
