Aqtóbede gaz quıý beketinde turǵan kólik órtenip, úsh adam janyp ketti
AQTÓBE. KAZINFORM — Oqıǵa keshe túnde Aqtóbe qalasynda boldy. Kólik ishinde tirideı janyp ketken úsh adamnyń ekeýi kámelet jasqa tolmaǵan.
Aqtóbe oblystyq TJD baspasóz qyzmetiniń habarlaýynsha, 112 nómirine habar saǵat 22:55–te túsken. Órt sóndirýshiler Aqtóbe qalasyndaǵy Bógenbaı batyr kóshesinde ornalasqan avtogaz quıý beketine shuǵyl jetip, órt saǵat 23:03–te tolyq sóndirildi.
— Órt sóndirý kezinde kólik ishinen 3 adamnyń denesi tabyldy. Onyń ekeýi kámeletke tolmaǵan. Taǵy bir adam aýrýhanaǵa jetkizildi, — dep habarlady Aqtóbe oblystyq TJD baspasóz qyzmeti.
Oqıǵa ornyna 10-nan astam tehnıka men 50-den astam qyzmetker bardy. Órt sóndirýshilermen qatar Jedel-qutqarý jasaǵynyń qutqarýshylary men Apattar medıtsınasynyń mamandary boldy. Qazirgi kezde órttiń qalaı tutanǵany anyqtalyp jatyr.
Eske salsaq, naýryzda Aqtóbe qalasynda «Ekogaz» gaz quıý beketi jaryldy.
